Shpërthimi eksplozivi ne nje vilen e nje emigranti ne Fier. Ngjarja ka ndodhur ne oret e para te mengjesit dhe per fat ka shkaktuar vetem deme materiale dhe asnje te lenduar. Sipas burimeve te policise mesohet se shperthimi ka ndodhur ne banesen tip vile te shtetasit Altin Plepi, ne lagjen Afrim i Ri ne Fier.
Familja Plepi jeton prej disa vitesh ne Itali dhe ne momentin qe ka ndodhur shperthimi ne banese nuk ka qene asnje nga pjesetaret e familjes.
Ne vend kane mberritur forca te policise te cilet po verifikojne demet dhe po hetojne per zbardhjen e ngjarjes.(Panorama)

Një ngjarje e rëndë ka ndodhur rreth orës 12 e 30 të paradites së të hënës në fshatin Kreshpan të komunës Cakran të rrethit Fier. Një 22-vjeçar banor i këtij fshati i ka dhënë fund jetës duke u vetëvrarë me një plumb në kokë.Por ajo që të trondit më shumë është fakti se djali i dyshuar si i vetëvrarë është djali i Faik Myrtaj, i cili humbi jetën në protestën e 21 janarit organizuar nga opozita.

Gjithsesi Bardhosh Myrtaj, sipas të afërmve të ardhur në spital mendohet se kohët e fundit ai ka qënë shumë i mërzitur dhe i vetmuar nga pjestarët e tjerë të familjes gjë të cilëen e reflektonte dhe në shtimin e dozës së duhanit që pinte. Ndërkohë po nga të afërm të tij ditën që ndodhi ngjarja ai kishte telefonuar dajën e tij për të marë.motorçikletën duke i treguar edhe vëndëdodhjen.

Daja pasi vjen në vëndin ku i tha nipi e gjen atë të shtrirë në tokë të plagosur në kokë dhe me një pellg gjaku që i kishte mbuluar fytyrën. Menjëherë ai ka njoftuar policinë e cila mbërriti në vendngjarje. Megjithëse ai ështe dërguar menjëherë në spital, ku nuk ka mundur t’i shpëtojë plagës së marë nga plumbi në kokë. Më pas ai është çuar në morgun e spitalit të Fierit në pritje për t’i bëtrë autopsinë

Në reagimin e saj zyrtar gjatë hetimeve u konstatua se shtetasi Bardhosh Myrtaj, 22 vjeç, banues në fshatin Kreshpan, komuna Cakran të rrethit Fier, është vetëvrarë me armë zjarri pistoletë në vëndin e quajtur “Antenat” në fshatin Kreshpan.

Sipas policisë vazhdon puna intesivisht për zbardhjen e shkaqeve, rrethanave si dhe dokumentimin e plotë ligjor të kesaj ngjarje.(Shekulli)

Ndërsa projektligji i propozuar për Amnistinë Fiskale diskutohej në Komisionin e Ekonomisë dhe Financave, opozita u largua pasi kërkoi që projektligji në fjalë të kishte një kalendar të përcaktuar, në mënyrë që të mos jetë një ligj elektoral. Deputetët e maxhorancës këmbëngulën për uljen e tarifave, siç kishte propozuar dhe ritheksuar edhe dje në Komision, Dhoma e Tregtisë dhe Industrisë, por Ministri Bode, i pranishëm në komision i cilësoi kërkesat e biznesit si të pakuptimta. Bode argumentoi përgjigjen e tij, duke theksuar se, tarifat janë shumë të ulëta dhe simbolike. “Nëqoftëse do të rivlerësojmë një aset 3 mln lekë, ai (personi juridik) do të paguajë 6 mln lekë e do ta amortizojë nesër 10 mln lekë. Fitimi neto në këtë rast është 3 mln lekë. Parapaguan 60% të fitimit që do të marrë nesër. Prandaj nuk ka sens kërkesa e biznesit, taksa është simbolike. Rivlerësimi sot është zero. Por nëqoftëse doni të amortizoni, parapaguani 60%” – u shpreh ministri Bode. Deputeti socialist Erion Braçe e cilësoi sjelljen e ligjit të Amnistisë në Komision, si një provokim për opozitën. Sipas tij, ky ligj kërkon një kalendar të posaçëm, që grupet e interesit të kenë mundësi të diskutojnë gjatë e gjithashtu edhe komisioni të ketë kohën e tij për diskutim. Kreu i komisionit, Edmond Spaho debatoi me deputetin Braçe, duke iu drejtuar se kërkesat e tij janë strukturë jashtë komisionit. Ndërsa nënkryetarja socialiste e Komisionit, Mimi Kodheli, e quajti alogjike mënyrën se si ky projektligj është sjellë në komision vetëm 24 orët e fundit. “Partia Socialiste është një forcë e rëndësishme politike. Është në mbrojtje të interesave të konsumatorit dhe biznesit. Për shkak të pasojave që sjell, situatës politike dhe ekonomike, të presësh një ligj të tillë brenda 24 orëve është jashtë çdo logjike. Të futet në kalendar. Po flasim për mld lekë dhe padyshim për para që lidhen me ekonominë informale. Propozoj ta fusim në kalendar në Konferencën e Kryetarëve, në të kundërt, ky është një ligj i bërë natën. Na ka ardhur vetëm dje pasdite. Po shpejtoni të bëni një ligj se e kuptoni që jeni në rrugën e mundjes”, – u shpreh deputetja Kodheli. Kreu i Dhomës së Tregtisë dhe Industrisë, Nikolin Jaka shprehu edhe një herë në Komision propozimet e biznesit, ku fokusi ishte gjithpërfshirja e këtij procesi, ulja e tarifave, vetëdeklarimi të shoqërohet me kontrollet e administratës tatimore, sipërmarrja të ketë garanci të plotë, të përfshihen në ligj të gjitha llojet e detyrimeve, të mos ketë rikontrolle, por të merret i mirëqenë vetëdeklarimit. Ministri Bode theksoi se tarifat nuk diskutohen, ato janë më të ulta se norma vjetore e interesit dhe ka për qëllim shtrëngimin e instrumenteve të kontrollit pas Amnistisë. Debat në Komision ngjalli edhe tarifa prej 1%, që individët duhet të paguajnë në bazë të këtij ligji, për apartamentet e palegalizuar. Deputeti demokrat, Gjok Uldedaj propozoi që tarifa të ishte 0,5 %, ndërsa ministri Bode theksoi se 1% është falas. “Të gjitha pasuritë e individëve që shiten në treg dhe që kanë diferenca midis çmimit të blerjes, në momentin fillestar dhe atij të shitjes në tregun aktual, mbi këtë shumë paguhet 10 %. Më konkretisht, nëse një apartament i blerë në vitin 2002, kushtonte 30 mijë USD, dhe nëse shitet sot kushton 100,000 Euro, ka një diferencë në vlerë prej rreth 100,000 USD, çka do të bënte që tatimi në masën 10% të ishte 10,000 USD. Duke bërë rivlerësimin, qytetari do të paguajë vetëm 1,000 USD. Pra është një lehtësim për tregun imobilar në Shqipëri, duke i krijuar mundësi të gjithë individëve që të rivlerësojnë pasuritë e tyre” – u shpreh Bode.

Debati

Braçe: Mënyra se si e keni sjellë këtë ligj është provokim ndaj opozitës. Duhet kalendar i posaçëm për grupet e interesit dhe komisionin.

Spaho-Braçes: Je jashtë procedurës.

Braçe-Spahos: Po flas për struktura jashtë Komisionit që nuk i keni futur në Komision.

Spaho: Pikërisht, janë struktura jashtë komisionit, t’i qëndrojmë strukturave të komisionit.

Kodheli: Të futet në kalendar. Po flasim për miliarda lekë dhe padyshim për para që lidhen me ekonominë informale. Propozoj ta fusim në kalendar në Konferencën e Kryetarëve, në të kundërt, ky është një ligj i bërë natën. Na ka ardhur vetëm dje pasdite. Po shpejtoni të bëni një ligj se e kuptoni që jeni në rrugën e mundjes

Uldedaj: Rivlerësimi i banesave të ketë tarifën 0,5%

Bode: 1% është falas

Kush përfiton nga Amnistia Fiskale

-Përfitojnë individët dhe ata janë të lirë të deklarojnë të gjitha shumat monetare që disponojnë dhe që i kanë të palegalizuara, duke paguar një vlerë prej 3% të shumës, duke i futur në sistemin bankar, sistemin financiar apo në forma të tjera të investimit të tyre në ekonominë shqiptare kundrejt një pagese prej 3 %.

-Individët do të ftohen për të rivlerësuar kapitalet e tyre fikse, përmes një pagese prej 1 % të shumës që ai vlerësohet.

-Individëve u falen të gjitha taksat dhe tatimet të papaguara deri në fund të vitit 2010, qofshin këto taksa vendore apo kombëtare.

-Detyrimet e papaguara për makinat e importuara deri në fund të vitit 2010, u falen gjobat dhe interesat e llogaritura në doganë, nëse paguhet 50% e principalit të detyrimit.

-Të gjithë ata qytetarë që kanë të regjistruar biznes të vogël dhe që deklarojnë shuma monetare në bazë të këtij ligji, do të konsiderohen se i kanë paguar të gjithë detyrimet tatimore konform ligjit, deri më 31 Dhjetor 2010. Tarifa e këtij legalizimi është sa ajo e qytetarëve, pra 3 %.

-Të gjithë të vetëpunësuarve, u falen sigurimet shoqërore dhe shëndetësore dhe gjobat e kamat vonesat e papaguara deri më 31 Dhjetor 2008. U falen gjithashtu dhe 2 vitet e fundit, nëse paguajnë detyrimin e tyre për sigurime për vitin 2011. Kjo kategori, nëse dëshiron të paguajë detyrimet për kontributet, u falen gjobat dhe kamatë vonesat për të gjithë periudhën e kaluar.

-Personave fizike, biznes i vogël, u falen gjobat dhe kamat vonesat për të punësuarit e tyre, deri më 31 Dhjetor 2010.

-Biznesit të vogël, i cili është pajisur me kasë fiskale deri me 28 Shkurt 2011, u falen gjobat e marra për mosvendosjen e këtyre pajisjeve. Të gjithë ata që nuk janë pajisur me kasë fiskale, deri në afatin ligjor 28 shkurt 2011, janë të detyruar të paguajnë detyrimet ligjore dhe njëkohësisht penalitetet e reja që ne propozojmë, të vendosen pas kësaj amnistie.

-Të gjithë kompanitë shqiptare që kanë në bilancet e tyre pasuri të paluajtshme dhe makineri pajisje me vlerë poshtë vlerës së tregut, mund të bëjnë rivlerësimin e tyre duke i pasqyruar në bilancin e vitit 2011. Tarifa për pasuritë e paluajtshme është 6% e diferencës që rrjedh nga rivlerësimi dhe 7% për makineri e pajisje.

-Biznesit i falet gjithashtu borxhi tatimor e doganor, me të gjithë komponentët e tij, gjoba dhe kamatvonesa deri më 31 dhjetor 2008.

-Bizneseve që paguajnë 50% të principalit të borxhit doganor për vitin 2009, u falen detyrimet që lidhen me këtë borxh, ndërsa për vitin 2010 nëse paguajnë 100% të principalit të borxhit doganor, u falen gjobat dhe kamatëvonesat.

-Bizneseve që paguajnë 30% të principalit të borxhit tatimor për vitin 2009, u falen detyrimet që lidhen me këtë borxh.

-Bizneseve që paguajnë 50% të principalit të borxhit tatimor për vitin 2010, u falen të gjitha detyrimet që lidhen me këtë borxh.

-Bizneseve u falen kamat vonesat dhe gjobat për detyrimet për sigurimet shoqërore e shëndetësore të papaguara.

-Bizneseve u krijohet mundësia që të vetëdeklarojnë detyrimet tatimore e doganore të padeklaruara për periudhën deri më 31 Dhjetor 2010 dhe nëse paguajnë 50% të diferencës që rrjedh nga ky vetëdeklarim, u falet pjesa tjetër së bashku me gjobat e kamatvonesat që do të aplikoheshin. Kur amnistia shoqërohet me fshehje, kontrollet e mëvonshme do të ushtrojnë penalitetet në rritje.(MAPO)

Pas deklaratave të bëra nga ministri i jashtëm grek, referuar gjithnjë marrëveshjes së ujërave mes nesh dhe shtetit fqinj, numri dy i KLD-së, Kreshnik Spahiu ka kërkuar zbatim rigoroz të vendimit të Gjykatës Kushtetuese, që e ka hedhur poshtë marrëveshjen. Gjatë një reagimi për deklaratat e bëra, që synojnë nxitjen e një marrëveshjeje për ndarjen e territorit ujor, Spahiu ka theksuar se ka pasur vetëm negociata dhe marrëveshje politike që u hodh poshtë nga Kushtetuesja.
“Cdo shtet dhe qeveri e BE duhet të respektojë parimet e së drejtës ndërkombëatre, shtetin juridik dhe legjislacionin, Gjyjata Kushtetutes e jona është shprehur qartë me papajtueshmërinë kushtetuese që kishte marrëveshja për ndarjen territoriale të ujërave. Është detyrim i cdo kujt dhe i institucioneve të respektojnë sovranitetin dhe rendin juridik. Deklaratet politike të bëra, që bien në kundërshtim të hapur me vendimet e gjykatave shqiptare, cenojnnë rendin juridik në Shqipëri”- ka thënë ai.(Panorama)

Menjëherë pas dorëheqjes së Ilir Metës nga dy postet që mbante atë të Zv/kryeministrit dhe ministrit të Ekonomisë janë propozuar edhe emrat e parë nga kryesia e LSI. Sipas burimeve nga LSI mësohet se është propozuar në postin e ministrit të Ekonomisë, Tregtisë dhe Energjitikës, Nasip Naço i cili aktualisht mban postin e nënkryetarit të parlamentit. Ndërkohë që në vend të tij, numrin dy të parlamentit të jetë Vangjel Tavo.
Ndërsa ministri i Jashtëm Edmond Haxhinasto, propozohet që të marrë përsipër edhe postin e zv.kryeministrit. Por këto propozime do t’i paraqiten kryministrit Sali Berisha, i cili pritet që të jap miratimin e tij për këto poste, duke bërë që të mbeten sërish të Lëvizjes Socialiste për Integrim.
*****

Zv. Kryeministri, njëherësh Ministër I Ekonomisë, Tregtise dhe Energjitikes Ilir Meta jep dorëheqjen e parevokueshme në të dyja postet e tij në qeveri. Në një konferencë për shtyp Meta bëri publik vendimin duke e quajtur një vendim personal.

“Jap dorëheqjen e parevokueshme si ministër i Ekonomisë dhe si zëvendëskryeministër. Dorëheqjen ia kam komunikuar kryeministrit Berisha dhe pas këtij momenti jam në dispozicion të prokurorisë për hetim”-tha Meta

Sipas Metës, Shqipëria nuk mund të merret peng nga krimi i organizuar dhe monstra si Dritan Prifti, për të cilin u shpreh se ka një të kaluar kriminale.

Dorëheqja e ministrit Meta vjen 3 ditë pas publikimit të video-skandalit.(Shekulli)

Ngjarjet rrugore, gjatë orëve të para të ditës së djeshme në Fier dhe Peqin

E diel e përgjakur në akset nacionale të vendit. 11 të plagosur ka qenë bilanci i 2 aksidenteve të ndodhura dje, gjatë orëve të parë të ditës, në autostradën Fier-Vlorë dhe Elbasan-Peqin. Ngjarja e parë rrugore ka ndodhur rreth orës 05:00 të së dielës, kur në aksin rrugor Fier–Vlorë, në vendin e quajtur Ferras, dy automjete janë përplasur me pasojë plagosjen e gjashtë personave. Burime nga vendi i ngjarjes bëjnë të ditur se automjeti tip “Benz” me targa FR 50-51B, që drejtohej nga 51-vjeçari Ilir.M., është përplasur me një automjet tjetër po tip “Benz” me targa VL 23-92 A, që po lëvizte në drejtim të Vlorës. Në automjetin me targa të Fierit ndodheshin vetëm drejtuesi me bashkëshorten, L.M., 45 vjeçe, ndërsa në mjetin e Vlorës ndodheshin katër persona, mes tyre një çift të moshuarish. Mjetet janë përplasur duke shkaktuar plagosjen rëndë të të dyja çifteve të bashkëshortëve nga Fieri dhe Vlora. Për pasojë fierakët L.M, 45 vjeçe, dhe Ilir. M, 51 vjeç, si dhe çifti i të moshuarve nga Vlora me inicialet M.N dhe T.N, përkatësisht 65 dhe 70 vjeç, janë çuar me urgjencë në spitalin e Fierit, ku i janë nënshtruar ndërhyrjes mjekësore. Gjendja e tyre shëndetësore vazhdon të jetë e rëndë, si pasojë e plagëve të shumta, që kanë marrë në momentin e përplasjes, ndërkohë që dy personat e tjerë pasagjerë në mjetin me targa të Vlorës, fatmirësisht kanë marrë vetëm disa plagë të lehta. Sipas policisë rrugore, aksidenti është shkaktuar si rezultat i shkeljes së rregullave të qarkullimit rrugor, duke tejkaluar shpejtësinë e lejuar, por ende nuk ka një konstatim zyrtar për përcaktimin e shkakut të aksidentit. Ekspertët e policisë rrugore po punojnë për dokumentin e plotë të ngjarjes dhe vënien përpara përgjegjësisë të shkaktarit. Ndërkohë një tjetër aksident i rëndë me pasojë plagosjen e pesë personave, ka ndodhur dje në mesditë në aksin rrugor Elbasan–Peqin, në vendin e quajtur “Unaza e Peqinit”. Burime të Komisariatit të Policisë Peqin bëjnë të ditur se një automjet tip “Skoda” me targa të huaja BA 404 TA, është përplasur me një mjet tip “Benz” me targë CD 289RB. Si pasojë e aksidentit janë dëmtuar: Erlin Xhafa, 16 vjeç, Hekuran Shkëmbi, 32 vjeç, Redion Xhafa, 14 vjeç, Eva Xhafa, 18 vjeç dhe Andi Xhafa, 22 vjeç. Menjëherë pas përplasjes, të dëmtuarit janë dërguar me urgjencë për në spitalin kirurgjikal të Elbasanit, ku ndodhen nën kujdesin e mjekëve. Sipas policisë lokale mësohet se shkak i aksidentit është bërë lëvizja e gabuar e drejtuesit të mjetit tip “Benz”, i cili ka lëvizur në kah të kundërt të rrugës. Ndërsa policia vazhdon hetimet për dokumentin e plotë të ngjarjes rrugore, burimet spitalore konfirmojnë se të plagosurit janë jashtë rrezikut për jetën.

Zbulohen detajet e vrasjes në Fier. Nënë e bir shkuan të armatosur për t’u “sqaruar”

Ylli Zeqaj, 48-vjeçari nga Fieri që u gjet i vdekur paraditen e së dielës në banesë, u vra nga djali i tij adoleshent, i cili e ka kryer krimin i shtyrë nga e ëma. Shkak është bërë tentativa e viktimës për të shitur gjysmën e banesës, kur dikur jetonte me ish-bashkëshorten, nga e cila ishte divorcuar një vit më parë. Ky ka qenë konkluzioni që ka nxjerrë Policia e Fierit mbrëmjen vonë të së dielës.
Hetimet

Vetëm nëntë orë hetime i janë dashur Policisë së Fierit për të zbardhur vrasjen e 48-vjeçarit Ylli Zeqaj, i cili u gjet i masakruar me 8 plagë në trup. Telefonata e fundit që viktima kishte kryer me ish-bashkëshorten ka çuar policinë që të dyshojë që në fillim se bëhej fjalë për një krim brenda familjes. Qysh në momentet e para, grupi i hetimit ka marrë në pyetje të afërmit e Ylli Zeqajt, përfshi edhe ish-bashkëshorten, Luljetën, dhe dy djemtë të çiftit të divorcuar prej një viti.

Sipas burimeve të gazetës, brenda grupit hetimor mësohet se gjatë telefonatës së fundit më datë 22 korrik, Luljeta dhe djali i tij e kishin kërcënuar 48-vjeçarin se do ta vrisnin.

Burimet e policisë bëjnë të ditur se Luljeta Zeqaj, ish-bashkëshortja e viktimës, është marrë në pyetje për herë të parë mesditën e së dielës në banesën e saj në lagjen “1 Maji”, ku jetonte pas divorcit me Yllin. Ajo është ripyetur pasditen e së dielës dhe më pas është marrë me furgonin e patrullës policore për t’u shoqëruar në mjediset e komisariatit, ku pas përballjes me provat i janë vënë prangat nën akuzën e vrasjes së kryer me paramendim dhe bashkëpunim.

Bashkë me të policia ka shoqëruar edhe djalin adoleshent, i cili është “tradhtuar” nga hetimet speciale të policisë. Në pritje të zbardhjes së telefonatës së fundit, gjatë përgjimit në dhomat e paraburgimit djali adoleshent ka shfaqur ankth për atë që kishte kryer, ndërsa më pas ka treguar çdo gjë për policinë. Në gjendje të rëndë depresioni, 16-vjeçari ka treguar orë pas ore atë çka kishte kryer ai dhe e ëma më 23 korrik. Në prani të psikologut, policia e ka njohur atë me akuzën, e cila është e njëjtë me të së ëmës. Mësohet se një akuzë tjetër rëndon mbi djalin vrasës. Bëhet fjalë për akuzën e mbajtjes së armëve të ftohta pa leje.
Viktima

Ylli Zeqaj është gjetur i vrarë në shtëpinë e tij nga prindërit dhe vëllezërit mëngjesin e së dielës. Ata ishin njoftuar nga fqinjët se nga brenda shtëpisë në katin e parë të një pallati pesëkatësh vinte erë e keqe. Më pas është njoftuar policia, e cila ka mundur të zbardhë plotësisht krimin e radhës brenda familjes. Viktima njihet prej policisë si person me precedentë penalë. Ai ishte denoncuar në polici nga gruaja për dhunë përpara divorcit. Ceremonia mortore e tij është zhvilluar në fshatin e lindjes në Mallakastër, ku ai është përcjellë për në banesën e fundit nga prindërit, vëllezërit, miqtë dhe të afërmit.

Fier- Kanceri i gjirit është sëmundja që ka numrin më të lartë të personave të prekur

Rritet ndjeshëm numri i të prekurve nga sëmundjet kancerogjene në qytetin e Fierit. Ndryshe nga vitet e kaluara, kësaj here janë femrat ato që shënojnë numrin më të lartë të personave të prekur nga tumoret e rënda. Sipas statistikave të drejtorisë së grupit spitalor Fier, mësohet se numri i të prekurve nga sëmundjet kancerogjene për çdo vit arrin nga 470 deri në 500 persona. Një vit më parë ky numër ka qenë 527, ndërkohë që për gjashtë muajt e parë të këtij viti regjistrohen plot 400 raste më shumë. Sipas burimeve zyrtare nga autoriteti i statistikave, theksohet se afro 70 për qind e të prekurve i përkasin gjinisë femërore. Llojet më të përhapura të kancerit te femrat janë kryesisht ai i gjirit dhe i qafës së mitrës. “Kanceri i gjirit është sëmundja që ka numrin më të lartë të personave të prekur nga sëmundjet kancerogjene në Fier. Moshat e personave që vuajnë pasojat e kësaj sëmundjeje janë të ndryshme, duke filluar që nga të rinjtë e deri te të moshuarit”, bëjnë të ditur burime nga zyra e statistikave të Fierit.

Në kuadër të përhapjes së kancerit të gjirit, institucionet përkatëse kanë nisur një fushatë sensibilizuese, me qëllim këshillimin e femrave. Drejtoria e Shëndetit Publik u bën thirrje të gjitha grave që t’i nënshtrohen kryerjes së mamografisë dhe pap-testeve. Specialistët thonë se nëse kjo sëmundje evidentohet që në fillimet e përhapjes së saj, shanset për t’u kuruar përfundimisht prej saj janë të larta. Nga ana tjetër, në qytetin e Fierit paraqitet edhe një numër i konsiderueshëm personash që vuajnë nga kanceri i lëkurës, apo i rrugëve të frymëmarrjes.

Shkaqet kryesore të të prekurve nga sëmundjet kancerogjene, sipas mjekut Kristaq Qirushi, janë kequshqyerja, mjedisi i ndotur, ulja e numrit të lindjeve dhe përdorimi i kontraceptivëve.

Ylli Zeqaj u masakrua me thikë. Policia arreston ish-gruan dhe djalin 16 vjeç

Një 48-vjeçar nga Fieri është gjetur i masakruar në banesën e tij, ndërkohë që policia ka arrestuar djalin dhe ish-bashkëshorten e tij, të cilët dyshohet se kanë kryer krimin brenda familjes. Viktima, Ylli Zeqaj, është gjetur nga njëri prej djemve mes pellgut të gjakut në banesën e tij në lagjen “Apolonia” të këtij qyteti. 48-vjeçari kishte rreth një vit që ishte divorcuar nga bashkëshortja, me të cilën kishte dy djem.
Ngjarja

Ngjarja e rëndë është konstatuar dje, rreth orës 10.30, ndërsa dyshohet se Ylli Zeqaj është vrarë dy ditë më parë. Burime nga vendi i ngjarjes bëjnë të ditur se 48-vjeçari është gjetur nga i biri, Mariusi, i shtrirë në dysheme, mes një pellgu gjaku. Ai ndodhej në një nga dhomat e shtëpisë dhe nuk shfaqte shenja jete. I biri, i trembur nga skena që ka parë, ka vrapuar në lagjen “Kastriot”, ku banonte gjyshja e tij dhe mes lotëve ka treguar se çfarë kishte parë në shtëpi. Menjëherë drejt banesës së Zeqajt kanë rendur të afërmit, të cilët kanë lajmëruar policinë. Drejt vendit të ngjarjes janë nisur dy automjete të patrullës së përgjithshme të Policisë së Fierit. Uniformat blu kanë bërë ekspertizën dhe trupi i pajetë është dërguar për në morgun e spitalit rajonal të qytetit për t’iu nënshtruar autopsisë.
Hetimet

Nga hetimet paraprake ka rezultuar se 48-vjeçari ka gjetur vdekjen si pasojë e tetë plagëve të thella që dyshohet se janë shkaktuar nga një thikë e gjatë. Sipas burimeve zyrtare të policisë, 48-vjeçari është masakruar disa ditë më parë dhe trupi është gjetur rastësisht nga i biri. Grupi hetimor i ngritur për këtë ngjarje e përqendroi punën te dyshimet për një krim brenda familjes dhe vetëm disa orë pas zbulimit të kufomës arriti të siguronte prova e fakte që tregojnë se vrasja është bërë nga ish-bashkëshortja dhe nga djali 16 vjeç i viktimës.

Hetuesit mësuan nga të afërmit se viktima ka pasur gjatë gjithë kohës grindje me ish-bashkëshorten. Ai prej disa kohësh kishte nxjerrë në shitje shtëpinë dhe ky vendim nuk është mirëpritur nga ish-gruaja, e cila kishte të drejta pronësie. Pas divorcit, ajo banonte në lagjen “1 Maji” të Fierit, bashkë me dy djemtë. Tri ditë më parë viktima kishte komunikuar me ish-gruan, e cila i kishte telefonuar sapo kishte marrë vesh se 48-vjeçari po bënte një ndarje me mur në njërën prej dhomave të shtëpisë.

Pas një pune intensive hetimore, policia arrestoi si të dyshuar për vrasjen Luljeta Zeqajn, 45 vjeçe dhe djalin e saj, A.Zeqaj. Sipas burimeve zyrtare të policisë, nënë e bir kanë kryer në bashkëpunim vrasjen e Ylli Zeqajt të premten më 23 korrik, pas një sherri që lidhej me pronësinë e banesës.

Fier- Ardhja e emigrantëve ka nisur të japë shenjat e para të fluksit të rritur për shtetasit që u drejtohen operatorëve të aplikimit për karta identiteti dhe pasaporta biometrike. Sipas punonjësve të shërbimit të zyrave të gjendjes civile të katër rajoneve, edhe në sportelet e këtyre të fundit ka nisur të përcillet ky fluks. Prej më shumë se një jave, fluksi i aplikimeve për dokumentet e identifikimit, por edhe për certifikata, është rritur dyfish në krahasim me periudhën e mëparshme. Mesatarisht tani kryhen nga 220 deri në 300 aplikime në një ditë. Ndërkohë që të pestë operatorët e Fierit janë në shërbim të të interesuarve për karta dhe pasaporta. Duhet theksuar se gjatë dy javëve të fundit në zyrat e aplikimit nuk ka pasur probleme me linjën e internetit apo dhe me furnizimin me energji elektrike, ndryshe nga gjendjet civile, të cilat një javë më parë nuk kishin linjë interneti dhe nuk mund të prodhonin dot certifikata të printuara. “Duke filluar nga e hëna e kaluar, fluksi në gjendjet civile të Fierit dhe në zyrat e aplikimit për karta e pasaporta është rritur. Mund të themi se, që nga ora tetë e mëngjesin nis aplikimi dhe fluksi i rritur. Sportelet gjatë gjithë ditës përballen me kërkesa të shumta. Nuk ka pasur asnjë lloj problemi gjatë ditëve të fundit tek operatorët dhe kjo duhet vlerësuar, pasi nuk është situata si në periudhën e mëparshme të kthimit të emigrantëve. Kështu shpresojmë të vazhdojmë”, ka thënë Arta Prifti, përgjegjëse e gjendjeve civile për qytetin e Fierit. Sipas Priftit mësohet se orët e paradites përballen me fluks më të rritur të aplikuesve, ndërsa gjatë ditës, deri pasdite në orën 16:00, kur operatorët mbyllin shërbimin, fluksi vjen duke rënë.