Dy zjarre të fuqishëm janë shënuar sot në mëngjes në territorin e rrethit të Fierit, raporton sot atsh.

Rreth orës 09.30 flakët kanë përfshirë kodrat e fshatit Shtyllas, rreth 9 km në jug- përëndim të Fierit dhe pak minuta më pas masivin e pishave të bregdetit të Semanit.

Forcat e sektorit të Mbrojtjes dhe Shpëtimit nga Zjarri pranë prefekturës së Fierit që kanë shkuar menjëherë në vendngjarje kanë mundur të vënë nën kontroll flakët në pyllin e Semanit, ndërsa vazhdon operacioni në kodrat e fshatit Shtyllas ku sipërfaqja e vatrave të zjarrit është shumë e gjerë.

Nga të dhënat e para mësohet se sipërfaqja e përfshirë nga flakët në kodrat e Shtyllasit, që janë të mbuluara nga shkurre, por edhe të kultivuara me ullinj dhe vreshta është rreth 3 ha, ndërsa sipërfaqa e prekur nga flakët në pishat e Semanit shkon në rreth 8 dynym.

Përsa i takon shkaqeve ende nuk ka të dhëna nga grupet e eksperteve që po hetojnë për këto raste.

Fituesit e fazës së parë të Lotarisë Amerikane 2012 do të dalin duke filluar nga data 1 maj e këtij viti. Duke u bërë apel aplikuesve të regjistruar në këtë program, që të mos bien pre e mashtrimeve të ndryshme, Amabsada Amerikane në Tiranë bën të ditur për ata që kanë aplikuar për DV-2012, se njoftimi zyrtar i përzgjedhjes do të kryhet drejtpërdrejt nëpërmjet kontrollit të statusit të aplikimit (Entry Status Check), i cili do të jetë në përdorim duke filluar nga data 1 maj 2011 në faqen e E-DV-së në http://www.dvlottery.state.gov/. Kjo është e vetmja mënyrë me të cilën ju do të merrni njoftim të statusit të aplikimit tuaj. Nëse ju merrni një njoftim me anë të postës elektronike apo me postë rreth përzgjedhjes suaj në lotarinë E-DV, duhet të dini që ky njoftim nuk është i ligjshëm. “Vetëm pasi ju të jeni përzgjedhur, pasi t’u jeni përgjigjur udhëzimeve të njoftimit të mundësuar për ju nëpërmjet kontrollit të statusit të aplikimit, si dhe pasi të ketë filluar procesimi i rastit tuaj, vetëm atëherë ju mund të merrni në vazhdim e-mail komunikimi nga QKK-ja, që ju njofton ju të shikoni kontrollin e statusit të aplikimit për informacione të reja rreth aplikimit tuaj. QKK-ja nuk do t’ju kërkojë juve t’u dërgoni para atyre, kësaj Ambasade, apo ndonjë ambasade tjetër të SHBA-së me postë, apo shërbime të tilla si western union. Nëse ju merrni një e-mail që ju duket të jetë një njoftim mashtrimi me Lotarinë DV, ne ju kërkojmë që ju ta dërgoni atë e-mail në adresën tonë të postës elektronike TiranaUSConsulate@state.gov”, – thuhet në programin e Lotarisë Amerikane që gjendet në faqen e Ambasadës Amerikane. Ndërkaq, njoftimi i ri i Ambasadës Amerikane u bën thirrje aplikuesve se vetëm kandidatët e përzgjedhur do të njoftohen nga Departamenti i Shtetit, Qendra Konsullore në Kentucky (QKK). Asnjë organizatë tjetër apo kompani private nuk është e autorizuar nga Departamenti i Shtetit për të njoftuar aplikatët e DV-së për përzgjedhjen e aplikimit të tyre si fitues, apo të hapave të mëtejshëm në procesimin e aplikimit për vizë. Numri juaj i konfirmimit bën të mundur që të futeni në faqen e internetit të Lotarisë për të marrë njoftimin nëse regjistrimi juaj është përzgjedhur nëpërmjet kontrollimit të statusit të regjistrimit “Entry Status Check”, që do t’ju vihet në dispozicion nga data 1 maj 2011 në adresën http://www.dvlottery.state.gov/. Kontrollimi i statusit të regjistrimit do të jetë mjeti i vetëm i informacionit për përzgjedhjen tuaj për DV-2012, duke ju dhënë udhëzime mbi vazhdimin e procesit të aplikimit, si dhe duke ju njoftuar për datën dhe kohën e takimit tuaj në Ambasadë për vizë emigrimi. “Të gjithë regjistruesit e Lotarisë DV-2012, duhet të shikojnë statusin e tyre nëpërmjet faqes së internetit për të parë nëse regjistrimi i tyre është përzgjedhur si fitues ose jo. Të përzgjedhurit do të njoftohen nëse janë përzgjedhur nëpërmjet kontrollimit të statusit të regjistrimit, duke filluar nga 1 maj 2011 në adresën http://www.dvlottery.state.gov/. Të përzgjedhurit do të drejtohen në një faqe konfirmimi, ku dhe do t’u jepen udhëzime të mëtejshme, përfshirë dhe informacione për pagesat lidhur me emigracionin në Shtetet e Bashkuara. Kontrollimi i statusit të regjistrimit ‘Entry Status Check’ do të jetë e vetmja mënyrë me të cilën të përzgjedhurit do të njoftohen. Ata që janë përzgjedhur nuk do të njoftohen me e-mail. Ata individë që nuk janë përzgjedhur do të njoftohen vetëm duke parë statusin e tyre në internet te kontrolli i statusit të regjistrimit”, – sqarohet në njoftimin e Ambasadës Amerikane. Programi i vizave emigruese të diversitetit (Lotarisë Amerikane) i autorizuar nga Kongresi Amerikan mundëson vit për vit 50 000 viza diversiteti, nxjerrë nga përzgjedhje të rastësishme midis të gjitha aplikimeve, personave, të cilët plotësojnë kërkesat strikte të kualifikimit nga vende me emigracion të ulët për në Shtetet e Bashkuara.

Policia e Shtetit nëpërmjet një deklarate njofton se, Shkolla e Policisë gjatë ditës së sotme ka shpallur fituesit  e testimit me shkrim për Qarkun e Fierit, për kandidatët  që kanë aplikuar për të ndjekur Shkollën Bazë të Policisë për “Patrullë të Përgjithshme”.

Mësohet se gjatë testimit me shkrim morën pjesë 111 kandidatë, nga 138 persona të cilët kanë aplikuar në periudhën shtator-dhjetor 2010.

Sakaq në përfundim të testimit me shkrim u shpallën fitues 59 prej tyre, të cilët grumbulluan mbi 60 pikë gjatë testimit.

Sipas Policisë së Shtetit, kandidatët që u shpallën fitues të testimit me shkrim do t’i nënshtrohen fazave të tjera të testimit.

Ku me datë 02.06.2011, në orën 07.00, në Stadiumin Kombëtar “Qemal Stafa” Tiranë, do të zhvillohet testimi fizik i tyre dhe pjesëmarrësit duhet të kenë me vete fletën e pranimit në testin me shkrim dhe kartelën shëndetësore të lëshuar nga mjeku i familjes, pasi në të kundërt nuk do të pranohen për t’u futur në garat e testimit fizik.

Fituesit e testimit me shkrim duhet të paraqiten ditën dhe orën e përcaktuar për testimin fizik të veshur me uniformë sportive.

Pikët e grumbulluara nga kandidatët që iu nënshtruan testimit me shkrim gjatë ditës së sotme në qarkun e Fierit:(NOA)

Shpërthimi eksplozivi ne nje vilen e nje emigranti ne Fier. Ngjarja ka ndodhur ne oret e para te mengjesit dhe per fat ka shkaktuar vetem deme materiale dhe asnje te lenduar. Sipas burimeve te policise mesohet se shperthimi ka ndodhur ne banesen tip vile te shtetasit Altin Plepi, ne lagjen Afrim i Ri ne Fier.
Familja Plepi jeton prej disa vitesh ne Itali dhe ne momentin qe ka ndodhur shperthimi ne banese nuk ka qene asnje nga pjesetaret e familjes.
Ne vend kane mberritur forca te policise te cilet po verifikojne demet dhe po hetojne per zbardhjen e ngjarjes.(Panorama)

Babë e bir kanë tentuar të vrasin një të afërmin e tyre me armë zjarri, pushkë. Ngjarja ka ndodhur në fshatin Ngjeqar, Komuna Kurjan në Rrethin e Fierit mbrëmjen e së shtunës. Burime policore thanë se konflikti mes të afërmeve ka pasur si shkak një çështje pronësie. Burimet thanë se ajo është pronë publike, ndërkohë që dyshohet të jetë zaptuar prej vitesh nga pala që ka probleme me policinë aktualisht. Burime nga fshati Ngjeqar pohojnë për gazetën se prej vitesh pjesëtarë të fisit Feleqi janë përfshirë në debate lidhur me pronësinë e disa ullishtave, por edhe të sipërfaqeve të tokave që i kanë njëri pas tjetrit. Për debatet mes të afërmeve madje, ishin vënë në dijeni edhe drejtues të Komunës Kurjan, të cilët shpeshherë kishin ndërhyrë për zbutje konflikti. Mësohet gjithashtu se këto debate shpeshherë kanë degjeneruar në konfrontim fizik apo në ngjarje të rënda si plagosje. Kështu ka ndodhur edhe mbrëmjen e së shtunës rreth orës 19:00. Myftar Feleqi, 56 vjeç, ka nisur debatin me vëllain e tij, Ymer Feleqi, ndërsa janë përballur në rrugën pranë banesave. Debati me fjalë ka zgjatur për afro një orë. Mes vëllezërve, përveç sharjeve dhe fyerjeve janë përdorur edhe grushte dhe mjete të forta, këto të fundit të gjetura në rrugë pranë vendit ku debatonin. Pas ndërprerjes për disa minuta sherri është rindezur, por në skenë kanë hyrë edhe pjesëtarë të tjerë të familjeve respektive. Burimet nga fshati, por edhe ato të policisë thonë se aty ka pasur edhe përleshje. Ndërkohë, që në acarim e sipër, Myftar Feleqi, së bashku me të birin marrin pushkën që mbanin në shtëpi dhe qëllojnë në drejtim të vëllait dhe xhaxhait. Fatmirësisht, plumbi nuk ka kapur objektin e synuar, por një dele, e cila ka ngordhur në moment. Ndërsa shkrehja e armës vendosi mbylljen e sherrit autorët janë larguar në kodrat pranë fshatit, ndërkohë që banorët kanë njoftuar policinë. Pas marrjes së dëshmive, si dhe sigurimit të provave materiale, është bërë edhe arrestimi i një prej autorëve, pasi një tjetër ishte larguar. Arrestimi u krye në orën 23:00 të mbrëmjes pas përfundimit të procedurës përkatëse. Sipas burimeve të policisë së Fierit mësohet se “në orët e vona të mbrëmjes së të shtunës është prangosur 56-vjeçari Myftar Feleqi. Ndërkohë që djali i tij, Florian Feleqi, është shpallur në kërkim nga strukturat e policisë”. Po burimet zyrtare policore pohojnë se akuza e ngritur për babë e bir, Myftar dhe Florian Feleqi është ajo e vrasjes së mbetur në tentativë. Gjithashtu, policia ka gjetur si provë materiale edhe armën e zjarrit, një pushkë e modelit 56. Provë për policinë ka qenë edhe delja e ngordhur nga goditja me armë. Uniformat blu kanë nisur kërkimin e të riut Florian Feleqi në kodrat pranë fshatit. Është njoftuar edhe policia e Mallakastrës, pasi fshati është në kufi me fshatrat e rrethit në fjalë. Deri të dielën në mbrëmje policia nuk ka mundur të prangosë të kërkuarin. Hetimet nga ana tjetër kanë zbardhur edhe motivin e saktë të ngjarjes, që sipas policisë është ai i konfliktit për pronën publike, që pretendohet nga pala e prangosur.(Shqip)

Heqja e të moshuarve është bërë pas një takimi të Ponit me krerët vendorë

Mohimi i të drejtës i 100-vjeçarëve për të votuar dhe heqja e tyre nga listat përfundimtare të zgjedhësve ka ardhur si pasojë e një udhëzimi të Ministrisë së Brendshme në muajin mars 2011 drejtuar Drejtorisë së Përgjithshme të Gjendjes Civile. Në muajin mars, zv.ministri i Brendshëm, Ferdinand Poni, ka organizuar një takim me disa prej krerëve të pushtetit lokal, ku ka konfirmuar edhe vendimin për pastrimin e listave të zgjedhësve nga personat mbi 100 vjeç. Pikëpyetja e madhe qëndron në faktin se ku është bazuar në ligj mohimi i të drejtës së qytetarëve shqiptarë, të cilët kanë lindur përpara se Shqipëria të fitonte pavarësinë dhe për fatin e mirë sot gëzojnë shëndet të plotë dhe janë gjallë, por strukturat shtetërore u mohojnë të drejtën për të jetuar. Megjithëse kjo kategori është e vogël në numër, të drejtën për të votuar e ka çdo qytetar i Republikës së Shqipërisë. Neni 45 i Kushtetutës, kreu i tretë i saj për liritë dhe të drejtat politike specifikon se “çdo shtetas që ka mbushur tetëmbëdhjetë vjeç, qoftë edhe ditën e zgjedhjeve, ka të drejtën të zgjedhë dhe të zgjidhet”. Zoti dhe natyra u jep të drejtën të jetojnë atyre 100-vjeçarëve të paktë, ndërsa shteti në këtë vend u heq të drejtën e votës. Ky diskriminim bie ndesh edhe me nenin 18 të Kushtetutës, që thotë në mënyrë eksplicite se “askush nuk mund të diskriminohet padrejtësisht për shkaqe të tilla si gjinia, raca, feja, etnia, gjuha, bindjet politike, fetare a filozofike, gjendja ekonomike, arsimore, sociale ose përkatësia prindërore”. I kontaktuar lidhur me këtë çështje, drejtori i përgjithshëm i gjendjes civile, Armand Teliti, nuk jep shumë detaje lidhur me këtë proces, të cilin e quan teknik, por pohon për “Shqip” se “vendimi është marrë pas një udhëzimi të ministrit të Brendshëm dhe ligjit për gjendjen civile”. Në listën përfundimtare të votuesve më 8 maj janë gjithsej 3 milionë e 164 mijë e 859 zgjedhës. Shumica prej tyre janë në Tiranë me 749 mijë e 246 votues dhe Fier me 362 mijë e 727 zgjedhës. Më 8 maj do të jenë 4932 qendra votimi gjithsej për të zgjedhur drejtuesit e pushtetit vendor. Në diferencë nga lista paraprake e zgjedhësve në fund të muajit nëntor 2010, më 9 prill, Ministria e Brendshme publikoi 23 mijë votues më pak. Pjesë e kësaj kategorie që mungon në listat e zgjedhësve janë emrat e dubluar, personat që kanë lënë shtetësinë shqiptare apo janë ndarë nga jeta, dhe brenda tyre janë edhe ata pak persona që gëzojnë fatin e mirë të kenë lindur në vitin 1911 dhe të vazhdojnë të gëzojnë shëndet të plotë.(Shqip)

Një ngjarje e rëndë ka ndodhur rreth orës 12 e 30 të paradites së të hënës në fshatin Kreshpan të komunës Cakran të rrethit Fier. Një 22-vjeçar banor i këtij fshati i ka dhënë fund jetës duke u vetëvrarë me një plumb në kokë.Por ajo që të trondit më shumë është fakti se djali i dyshuar si i vetëvrarë është djali i Faik Myrtaj, i cili humbi jetën në protestën e 21 janarit organizuar nga opozita.

Gjithsesi Bardhosh Myrtaj, sipas të afërmve të ardhur në spital mendohet se kohët e fundit ai ka qënë shumë i mërzitur dhe i vetmuar nga pjestarët e tjerë të familjes gjë të cilëen e reflektonte dhe në shtimin e dozës së duhanit që pinte. Ndërkohë po nga të afërm të tij ditën që ndodhi ngjarja ai kishte telefonuar dajën e tij për të marë.motorçikletën duke i treguar edhe vëndëdodhjen.

Daja pasi vjen në vëndin ku i tha nipi e gjen atë të shtrirë në tokë të plagosur në kokë dhe me një pellg gjaku që i kishte mbuluar fytyrën. Menjëherë ai ka njoftuar policinë e cila mbërriti në vendngjarje. Megjithëse ai ështe dërguar menjëherë në spital, ku nuk ka mundur t’i shpëtojë plagës së marë nga plumbi në kokë. Më pas ai është çuar në morgun e spitalit të Fierit në pritje për t’i bëtrë autopsinë

Në reagimin e saj zyrtar gjatë hetimeve u konstatua se shtetasi Bardhosh Myrtaj, 22 vjeç, banues në fshatin Kreshpan, komuna Cakran të rrethit Fier, është vetëvrarë me armë zjarri pistoletë në vëndin e quajtur “Antenat” në fshatin Kreshpan.

Sipas policisë vazhdon puna intesivisht për zbardhjen e shkaqeve, rrethanave si dhe dokumentimin e plotë ligjor të kesaj ngjarje.(Shekulli)

Amnistia fiskale duket se do ketë një shtrirje më të gjerë nga sa ishte përfolur deri më tani. Krahas gjobave dhe detyrimeve të prapambetura të bizneseve dhe individëve, falja do të përfshijë edhe një mori detyrimesh të tjera që kryesisht individët kanë ndaj shtetit, të cilat kanë të bëjnë me taksat kombëtare dhe ato lokale.

Drafti përfundimtar, i cili do të miratohet në Kuvend për amnistinë fiskale, do të parashikojë edhe faljen e të gjitha gjobave të papaguara të makinave. Pra, çdo gjobë e marrë deri në fund të vitit 2010 për shkelje të rregullave të qarkullimit rrugor do të falen duke pastruar kështu regjistrat e tejfryrë me gjoba të pa mbledhura të Policisë Rrugore.

Zgjerimi i amnistisë fiskale u deklaruar dje nga Ministri i Financave, Ridvan Bode, i cili theksoi se pjesë e faljes do të jenë të gjitha detyrimet e prapambetura dhe gjobat që kanë të bëjnë me taksat kombëtare dhe ato lokale. Këtu përfshihen, gjobat dhe detyrimet e tjera për makinat, taksat e pushtetit lokal, taksat për ushtrimin e veprimtarisë së lojërave të fatit, etj.

Në rastin e makinave, qytetarët nuk do të jenë të detyruar të deklarojnë gjobat në mënyrë që ato të fshihen. Falja do të bëhet automatikisht nëpërmjet fshirjes së tyre nga regjistrat duke ia hequr shoferëve si detyrim për t’u paguar.

Policia rrugore ka ndërmarrë në mënyrë të përsëritur aksione për mbledhjen e gjobave të prapambetura në kryeqytet, por edhe në qytete të ndryshme të vendit me qëllim arkëtimin e miliona lekëve detyrime të regjistruar në emër të përdoruesve të makinave.

Ligji nuk do të mjaftohet vetëm me faljen e gjobave për makinat. Pjesë e faljes do të jetë të gjitha taksat dhe detyrimet e tjera apo edhe gjobat për shkaqe të tjera të papaguara. Kjo nismë vjen pas përfshirjes në falje edhe të gjysmës së doganës dhe gjithë kamatëvonesat nëse pronari paguan gjysmën e principalit të doganës.

Falja e taksave dhe detyrimeve të prapambetura për makinat ka të bëjë me “zerimin” e taksës së qarkullimit për makinat. Nëse i referohemi të gjitha këtyre ndryshimeve, nëse dikush që ka qarkulluar në vend jashtë çdo afati ligjor pa e zhdoganuar makinën, nëse paguan gjysmën e doganës së saj, do të ketë mundësi të pajisë normalisht atë me targa, sikur makina të kishte hyrë në mënyrë të rregullt në vend.

Më pas, përdoruesit i jepet mundësia që të fillojë nga e para pagesën e taksës së qarkullimit dhe të bëjë normalisht kontrollin teknik të mjetit. Në përfundim, makina do të rezultojë e rregullt edhe nga ana e dokumentacionit nëse pronari është i prirur të përfitojë nga falja.(Shekulli)

Ndërsa projektligji i propozuar për Amnistinë Fiskale diskutohej në Komisionin e Ekonomisë dhe Financave, opozita u largua pasi kërkoi që projektligji në fjalë të kishte një kalendar të përcaktuar, në mënyrë që të mos jetë një ligj elektoral. Deputetët e maxhorancës këmbëngulën për uljen e tarifave, siç kishte propozuar dhe ritheksuar edhe dje në Komision, Dhoma e Tregtisë dhe Industrisë, por Ministri Bode, i pranishëm në komision i cilësoi kërkesat e biznesit si të pakuptimta. Bode argumentoi përgjigjen e tij, duke theksuar se, tarifat janë shumë të ulëta dhe simbolike. “Nëqoftëse do të rivlerësojmë një aset 3 mln lekë, ai (personi juridik) do të paguajë 6 mln lekë e do ta amortizojë nesër 10 mln lekë. Fitimi neto në këtë rast është 3 mln lekë. Parapaguan 60% të fitimit që do të marrë nesër. Prandaj nuk ka sens kërkesa e biznesit, taksa është simbolike. Rivlerësimi sot është zero. Por nëqoftëse doni të amortizoni, parapaguani 60%” – u shpreh ministri Bode. Deputeti socialist Erion Braçe e cilësoi sjelljen e ligjit të Amnistisë në Komision, si një provokim për opozitën. Sipas tij, ky ligj kërkon një kalendar të posaçëm, që grupet e interesit të kenë mundësi të diskutojnë gjatë e gjithashtu edhe komisioni të ketë kohën e tij për diskutim. Kreu i komisionit, Edmond Spaho debatoi me deputetin Braçe, duke iu drejtuar se kërkesat e tij janë strukturë jashtë komisionit. Ndërsa nënkryetarja socialiste e Komisionit, Mimi Kodheli, e quajti alogjike mënyrën se si ky projektligj është sjellë në komision vetëm 24 orët e fundit. “Partia Socialiste është një forcë e rëndësishme politike. Është në mbrojtje të interesave të konsumatorit dhe biznesit. Për shkak të pasojave që sjell, situatës politike dhe ekonomike, të presësh një ligj të tillë brenda 24 orëve është jashtë çdo logjike. Të futet në kalendar. Po flasim për mld lekë dhe padyshim për para që lidhen me ekonominë informale. Propozoj ta fusim në kalendar në Konferencën e Kryetarëve, në të kundërt, ky është një ligj i bërë natën. Na ka ardhur vetëm dje pasdite. Po shpejtoni të bëni një ligj se e kuptoni që jeni në rrugën e mundjes”, – u shpreh deputetja Kodheli. Kreu i Dhomës së Tregtisë dhe Industrisë, Nikolin Jaka shprehu edhe një herë në Komision propozimet e biznesit, ku fokusi ishte gjithpërfshirja e këtij procesi, ulja e tarifave, vetëdeklarimi të shoqërohet me kontrollet e administratës tatimore, sipërmarrja të ketë garanci të plotë, të përfshihen në ligj të gjitha llojet e detyrimeve, të mos ketë rikontrolle, por të merret i mirëqenë vetëdeklarimit. Ministri Bode theksoi se tarifat nuk diskutohen, ato janë më të ulta se norma vjetore e interesit dhe ka për qëllim shtrëngimin e instrumenteve të kontrollit pas Amnistisë. Debat në Komision ngjalli edhe tarifa prej 1%, që individët duhet të paguajnë në bazë të këtij ligji, për apartamentet e palegalizuar. Deputeti demokrat, Gjok Uldedaj propozoi që tarifa të ishte 0,5 %, ndërsa ministri Bode theksoi se 1% është falas. “Të gjitha pasuritë e individëve që shiten në treg dhe që kanë diferenca midis çmimit të blerjes, në momentin fillestar dhe atij të shitjes në tregun aktual, mbi këtë shumë paguhet 10 %. Më konkretisht, nëse një apartament i blerë në vitin 2002, kushtonte 30 mijë USD, dhe nëse shitet sot kushton 100,000 Euro, ka një diferencë në vlerë prej rreth 100,000 USD, çka do të bënte që tatimi në masën 10% të ishte 10,000 USD. Duke bërë rivlerësimin, qytetari do të paguajë vetëm 1,000 USD. Pra është një lehtësim për tregun imobilar në Shqipëri, duke i krijuar mundësi të gjithë individëve që të rivlerësojnë pasuritë e tyre” – u shpreh Bode.

Debati

Braçe: Mënyra se si e keni sjellë këtë ligj është provokim ndaj opozitës. Duhet kalendar i posaçëm për grupet e interesit dhe komisionin.

Spaho-Braçes: Je jashtë procedurës.

Braçe-Spahos: Po flas për struktura jashtë Komisionit që nuk i keni futur në Komision.

Spaho: Pikërisht, janë struktura jashtë komisionit, t’i qëndrojmë strukturave të komisionit.

Kodheli: Të futet në kalendar. Po flasim për miliarda lekë dhe padyshim për para që lidhen me ekonominë informale. Propozoj ta fusim në kalendar në Konferencën e Kryetarëve, në të kundërt, ky është një ligj i bërë natën. Na ka ardhur vetëm dje pasdite. Po shpejtoni të bëni një ligj se e kuptoni që jeni në rrugën e mundjes

Uldedaj: Rivlerësimi i banesave të ketë tarifën 0,5%

Bode: 1% është falas

Kush përfiton nga Amnistia Fiskale

-Përfitojnë individët dhe ata janë të lirë të deklarojnë të gjitha shumat monetare që disponojnë dhe që i kanë të palegalizuara, duke paguar një vlerë prej 3% të shumës, duke i futur në sistemin bankar, sistemin financiar apo në forma të tjera të investimit të tyre në ekonominë shqiptare kundrejt një pagese prej 3 %.

-Individët do të ftohen për të rivlerësuar kapitalet e tyre fikse, përmes një pagese prej 1 % të shumës që ai vlerësohet.

-Individëve u falen të gjitha taksat dhe tatimet të papaguara deri në fund të vitit 2010, qofshin këto taksa vendore apo kombëtare.

-Detyrimet e papaguara për makinat e importuara deri në fund të vitit 2010, u falen gjobat dhe interesat e llogaritura në doganë, nëse paguhet 50% e principalit të detyrimit.

-Të gjithë ata qytetarë që kanë të regjistruar biznes të vogël dhe që deklarojnë shuma monetare në bazë të këtij ligji, do të konsiderohen se i kanë paguar të gjithë detyrimet tatimore konform ligjit, deri më 31 Dhjetor 2010. Tarifa e këtij legalizimi është sa ajo e qytetarëve, pra 3 %.

-Të gjithë të vetëpunësuarve, u falen sigurimet shoqërore dhe shëndetësore dhe gjobat e kamat vonesat e papaguara deri më 31 Dhjetor 2008. U falen gjithashtu dhe 2 vitet e fundit, nëse paguajnë detyrimin e tyre për sigurime për vitin 2011. Kjo kategori, nëse dëshiron të paguajë detyrimet për kontributet, u falen gjobat dhe kamatë vonesat për të gjithë periudhën e kaluar.

-Personave fizike, biznes i vogël, u falen gjobat dhe kamat vonesat për të punësuarit e tyre, deri më 31 Dhjetor 2010.

-Biznesit të vogël, i cili është pajisur me kasë fiskale deri me 28 Shkurt 2011, u falen gjobat e marra për mosvendosjen e këtyre pajisjeve. Të gjithë ata që nuk janë pajisur me kasë fiskale, deri në afatin ligjor 28 shkurt 2011, janë të detyruar të paguajnë detyrimet ligjore dhe njëkohësisht penalitetet e reja që ne propozojmë, të vendosen pas kësaj amnistie.

-Të gjithë kompanitë shqiptare që kanë në bilancet e tyre pasuri të paluajtshme dhe makineri pajisje me vlerë poshtë vlerës së tregut, mund të bëjnë rivlerësimin e tyre duke i pasqyruar në bilancin e vitit 2011. Tarifa për pasuritë e paluajtshme është 6% e diferencës që rrjedh nga rivlerësimi dhe 7% për makineri e pajisje.

-Biznesit i falet gjithashtu borxhi tatimor e doganor, me të gjithë komponentët e tij, gjoba dhe kamatvonesa deri më 31 dhjetor 2008.

-Bizneseve që paguajnë 50% të principalit të borxhit doganor për vitin 2009, u falen detyrimet që lidhen me këtë borxh, ndërsa për vitin 2010 nëse paguajnë 100% të principalit të borxhit doganor, u falen gjobat dhe kamatëvonesat.

-Bizneseve që paguajnë 30% të principalit të borxhit tatimor për vitin 2009, u falen detyrimet që lidhen me këtë borxh.

-Bizneseve që paguajnë 50% të principalit të borxhit tatimor për vitin 2010, u falen të gjitha detyrimet që lidhen me këtë borxh.

-Bizneseve u falen kamat vonesat dhe gjobat për detyrimet për sigurimet shoqërore e shëndetësore të papaguara.

-Bizneseve u krijohet mundësia që të vetëdeklarojnë detyrimet tatimore e doganore të padeklaruara për periudhën deri më 31 Dhjetor 2010 dhe nëse paguajnë 50% të diferencës që rrjedh nga ky vetëdeklarim, u falet pjesa tjetër së bashku me gjobat e kamatvonesat që do të aplikoheshin. Kur amnistia shoqërohet me fshehje, kontrollet e mëvonshme do të ushtrojnë penalitetet në rritje.(MAPO)

Vret të atin vetëm pak ditë pas daljes nga spitali. Policia arrestoi dje 45-vjeçarin Aleko Rrapi, i cili akuzohet për vrasjen e babait të tij 84-vjeçar, Koli Rrapi. Ngjarja mësohet se ndodhi mbrëmjen e së hënës, por trupi u gjet mëngjesin e së martës nga një e afërme e familjes. Burimet nga policia thanë se nuk dihet cila ka qenë biseda e fundit babë e bir, por djali kishte vetëm rreth një javë që kishte dalë nga spitali psikiatrik i Vlorës, ku kurohej prej disa vitesh.
84-vjeçari u vra në mënyrë çnjerëzore nga i biri me probleme psikike. Familja jetonte në lagjen “Mbrostar Ferko” të Fierit. Sipas burimeve nga policia, Koli Rrapi u qëllua me mjete të forta nga i biri. Banorët të cilët kanë dëgjuar britma në familjen e të moshuarit kanë menduar se ka qenë normale, pasi, sipas tyre, djali 45-vjeçar ushtronte shpesh dhunë mbi të atin.
Nga hetimet e para rezulton se Aleko Rrapi ishte larguar kohë më parë nga Shqipëri bashkë me të vëllezërit, të cilët jetonin në Amerikë. Vëllezërve u eci fati, ndërsa Aleko përfundoi në burg. Pas kryerjes së dënimit ai u kthye në Shqipëri gati pesë vjet më parë, pranë familjes së vet. Që atëherë mësohet të ketë shfaqur probleme mendore. Herë pas here 45-vjeçari kurohej në spitalin e Vlorës dhe më pas kthehej në shtëpi.
Banorë të lagjes ku banonte familja Rrapi thonë se djali e keqtrajtonte të atin jo rrallë pasi kthehej nga spitali. Madje, sipas tyre, edhe policia ka qenë e pranishme në disa raste, por dhuna ndaj të moshuarit nuk është ndalur. Madje, edhe vetë banorët i druheshin 45-vjeçarit.
Pak ditë më parë, Aleko ishte sërish në spitalin e Vlorës. Ai doli vetëm 4-5 ditë më parë, ndërkohë që të hënën në darkë, banorët ridëgjuan britmat nga shtëpia. Mëngjesin e së martës, një e afërme, e cila i shërbente të moshuarit pas vdekjes së bashkëshortes, e gjeti të vdekur 84-vjeçarin. Policia arrestoi djalin 45-vjeçar.
E pyetur lidhur me ngjarjen, drejtoresha e spitalit psikiatrik të Vlorës, nuk pranoi të japë asnjë deklarim, ndërsa u shpreh se për 45-vjeçarin duhet të shprehet mjeku i familjes, si dhe Drejtoria e Shëndetit Publik.
Brenda një jave është hera e dytë që të sëmurët mendorë shkaktojnë vdekjen e personave. Më datën 28 mars një 26-vjeçar vrau me mjete të forta një 9-vjeçar i cili po luante në oborrin e një fqinji me një tjetër fëmijë.(Shekulli)