Që prej tre muajsh ka nisur depistimi i të gjitha grave të territorit të Qarkut të Fierit, lidhur me sëmundjet gjinekologjike. Mjekët e këtij profili shprehen të shqetësuar për rritjen e sëmundshmërisë. Në kuadrin e hartimit të politikave shëndetësore, qeveria shqiptare, në bashkëpunim me Komunitetin Evropian, ka financuar një projekt të përbashkët për diagnostikimin, parandalimin dhe luftimin e kancerit të qafës së mitrës te gratë. Për herë të parë, në shtëpinë e lindjes së Fierit aplikohet programi i pap-testit, që ofrohet falas. Ky projekt do të zbatohet për 2500-50000 gra të rrethit të Fierit dhe mundëson për to një analizë të detajuar dhe të specializuar për identifikimin e kancerit të organeve riprodhuese.

Shefi i maternitetit të qytetit të Fierit, Besnik Brahimi, shprehet se “ka tre muaj që ka filluar ky projekt dhe ka për qëllim të konstatojë praninë e qelizave kancerogjene në organet riprodhuese”. Sipas tij, po vijon diagnostikimi masiv i femrave dhe pas disa javësh mendohet të realizohet depistimi i plotë i tyre. Mjeku gjinekolog, Eduart Kapaj, shprehet se “në bazë të analizave, që zakonisht zgjasin 10-14 ditë, do të shikohet mundësia e trajtimit terapeutik të grave. Verifikimi i përgjigjeve do të kryhet në Itali”, sqaron gjinekologu Kapaj.