Arrestohet nga forcat speciale Ben Qimja, furnitori i bandës së Aldo Bares

Biznesmeni Arben Isufi, i ashtuquajtur Ben Qimja dhe kapobanda i Fierit, personazhi që çarmatosi dhe ktheu mbrapsht me pistoletë në dorë grupin e gatshëm të policisë, që kishte shkuar për ta arrestuar, është prangosur ditën e djeshme nga një operacion i forcave speciale, që është zhvilluar në Tiranë. Policia tha se gjatë këtij operacioni special, uniformat blu kanë vënë nën pranga kapobandën e Fierit, i cili është akuzuar për veprën penale të vrasjes dhe dyshohet për trafik droge. I arrestuari Arben Isufi njihej si Ben Qimja dhe është arrestuar në Tiranë fare pranë Kopshtit Botanik, ndërkohë që hetohej më se 6 vjet nga drejtësia shqiptare.

Burimet policore bënë të ditur se operacioni është zhvilluar nga forcat speciale gjatë orëve të pasdites, pas lëshimit të urdhrit të prokurorit për arrestimin e biznesmenit Arben Isufi. Ky i fundit dyshohet se është kreu i bandës së Fierit dhe akuzohet për një vrasje në vitin 2002. Në ngjarjen e ndodhur gjashtë vjet më parë ka mbetur i vrarë Piro Koçiu. Sipas uniformave blu, kapobanda e Fierit është arrestuar në Tiranë, pranë Kopshtit Botanik. Ai ndiqej prej kohësh nga policia, e cila ka ngritur edhe një kurth për të. Teksa ka qenë, duke ecur me mjetin e tij për te kopshti zoologjik, është rrethuar nga dy mjete civile. Më pas, me maska në kokë, forcat speciale i kanë drejtuar pistoletat dhe e kanë izoluar për ta prangosur. Bashkë me Qimen ka qenë edhe një person tjetër, që është shoqëruar nga policia, por më pas është lënë sërish i lirë. Prej disa muajsh, policia ishte vënë në ndjekje të tij, i cili lëvizte shpesh nga Fieri në Tiranë. Shpesh herë, ai fshihej në disa prej lokaleve të miqve të tij, ku edhe ruhej nga policia. Për një periudhë të gjatë kohore, policia e ka mbajtur edhe në përgjim, ku ka mbledhur fakte të reja për implikimin e tij në krime të ndryshme.

I njohuri Ben Qimja akuzohet nga drejtësia shqiptare për vrasjen e shtetasit Piro Koçiu, ngjarje e ndodhur më datë 12 gusht të vitit 2002 në rrugën “Him Kolli” në Tiranë. Pas hetimeve të njëpasnjëshme, i arrestuari është evidentuar dhe më pas është arrestuar gjatë një operacioni special të uniformave blu. Policia kishte dështuar dy herë në përpjekjet e saj për të vënë në pranga biznesmenin nga qyteti i Fierit. Arben Isufi, i shpallur në kërkim që në shkurt të vitit 2006, pasi dyshohet për vepra të ndryshme penale, herën e fundit ka arritur të çajë rrethimin e policisë në Fier. Dështimi i operacionit të madh, me përfshirjen e forcave të rendit dhe atyre të ndërhyrjes së shpejtë, u bë publik vetëm 24 orë pasi Ahmet dhe Arben Isufi, xhaxha e nip, duke përdorur edhe armët arritën t‘u shpëtonin prangave. Policia njoftoi se gjatë operacionit të fundit, në maj të vitit 2007, në vendin e quajtur Sheq i Madh, Fier, u organizua operacioni policor për kapjen dhe ndalimin e Ahmet Isufajt, i shpallur në kërkim trafik të drogës në qershor të vitit 2006.

Dyshimet

Biznesmeni, furnitor i

bandës së Lushnjës

Biznesmeni Arben Isufi, personazhi që çarmatosi dhe ktheu mbrapsht me pistoletë në dorë grupin e gatshëm të policisë së Fierit, që kishte shkuar për ta arrestuar, akuzohet nga policia italiane si furnitori me kokainë i bandës së Lushnjës. Implikimi i tij në trafikun ndërkombëtar të kokainës është zbuluar gjatë përgjimeve të kryera nga Seksioni i Shtatë i Antidrogës së Torinos, e cila ishte duke gjurmuar aktivitetin e së ashtuquajturës banda e Lushnjës. Në dosjen hetimore janë të përfshira transkriptimet e dhjetëra telefonatave që hedhin dyshime të forta mbi aktivitetin e biznesmenit fierak, i njohur me nofkën Ben Qimja. Në telefonatat e regjistruara nga agjentët e Antidrogës së Torinos rezulton se biznesmeni fierak, jo vetëm ka pasur njohje me eksponentët kryesorë të së ashtuquajturës banda e Lushnjës, por ka bashkëpunuar me ta kryesisht për t‘i furnizuar me kokainë nga Holanda në drejtim të Italisë. Në dosjen 9772/02, mbi të cilën Gjykata e Torinos ka dhënë tashmë 15 dënime të rënda për pjesëtarët e bandës së Lushnjës, janë të zbardhura dhe një numër bisedash telefonike që Isufi ka bërë me Enver Dondollakun, i njohur ndryshe dhe si krahu i djathtë i Aldo Bares.