Pranohet kërkesa e PD-së për privatizimin e përpunimit të plehrave. “Ndëshkohen” romët. Pas debateve dhe zvarritjes së miratimit të buxhetit për privatizimin e Ndërmarrjes së Pastrim-Gjelbërimit, Bashkia e Fierit është duke studiuar mundësinë e dhënies me sipërmarrje të një prej shërbimeve që ofron ajo. Bëhet fjalë për shërbimin më të ri të kësaj ndërmarrjeje, veçimin e mbetjeve urbane në disa kategori. Lajmi bëhet i ditur për gazetën “Shqip” nga kryetari i bashkisë, Baftjar Zeqaj, i cili thotë se riciklimi i mbetjeve urbane kërkon patjetër ndarjen e tyre që në momentin e parë të grumbullimit. Ndërkaq, drejtues të kësaj ndërmarrjeje kanë sqaruar se deri më sot ky shërbim është mundësuar nga komuniteti rom.

“Me zhvillimin që ka sot Fieri, një shërbim i tillë duhej të kishte nisur me kohë. Deri më tani ndarja në kategori e mbetjeve urbane mbulohej nga ndërmarrja e pastrimit dhe nga komuniteti rom. Ky komunitet është cilësuar partneri ynë kryesor, pasi mundëson veçimin e mbetjeve urbane. Pjesëtarë të këtij komuniteti kanë qenë të interesuar për kanoçe, shishe plastike dhe materiale hekuri. Duke marrë këto kategori, mbeteshin vetëm mbeturinat urbane, që ne lehtësisht i groposnim”, tha drejtori i Ndërmarrjes së Pastrimit, Vangjel Ndreko.

Ndërkohë që kryetari i bashkisë dhe një staf i ngushtë i tij, ku bën pjesë edhe drejtori Ndreko, prej dy javësh po studiojnë mundësinë e dhënies me sipërmarrje të shërbimit të sipërcituar.
“Nuk bëhet fjalë për privatizim të ndërmarrjes, por për largim të një shërbimi në varësi të saj. Meqenëse është ofruar nga një kompani e huaj marrja e këtij shërbimi, ne jemi duke marrë vendimin e duhur. Duhet thënë se strategjia e zhvillimit të qytetit parashikon edhe një proces të tillë, pra riciklimin e mbetjeve urbane dhe veçimin e tyre që në momentin e parë, me qëllim që në një të ardhme shumë të afërt, ndarja e mbetjeve të bëhet nga vetë komuniteti”, ka thënë kryetari i Bashkisë së Fierit, Baftjar Zeqaj.

Zeqaj ka thënë se përfaqësuesit e kompanisë holandeze, që është ofruar të marrë përsipër këtë proces, kanë kryer dy takime në Bashkinë e Fierit gjatë javës së fundit dhe tashmë po trajtojnë me detaje shërbimin që ofrojnë. Kryebashkiaku i Fierit, Baftjar Zeqaj, edhe pse është vënë përpara përgjegjësisë për shkrirjen e ndërmarrjes së pastrimit me qëllim votimin e buxhetit, sërish e sheh si të pamundur realizimin e plotë të propozimit të PD-LSI. “Nuk besoj në dhënien e gjithë shërbimeve të ndërmarrjes me sipërmarrje, pasi qyteti i Fierit e ka pasur një gjë të tillë për disa vjet. Më pas është konstatuar se privatët kanë kryer abuzime të mëdha, për të cilat ne si bashki u jemi drejtuar autoriteteve përkatëse. Shërbime të veçanta mund të jepen, por komplet ndërmarrja në asnjë mënyrë, pasi është ende herët”, ka përfunduar Zeqaj.

Me largimin e shërbimit të veçimit të mbeturinave pritet që të ulet numri i punonjësve të ndërmarrjes. Fieri cilësohet si një nga qytetet më të pastër, por përplasjet politike po rrezikojnë që ta kthejnë atë në më të ndoturin.

FIER – Ekzekutivi i Bashkisë së Fierit e konsideroi si një shkelje të rëndë rimiratimin e projektbuxhetit 2010 nga maxhoranca prej 18 kartonësh. Kreu i bashkisë, Baftjar Zeqaj kërkoi ndihmën e kryeministrit, për të ndërhyrë në zgjidhjen e ngërçit të krijuar me këtë qeverisje vendore. Zeqaj tha se do t’i drejtohet edhe prefektit me një ankimim, që të mos konfirmojë ligjshmërinë e aktit administrativ të vendimmarrjes së miratimit me ndryshime të buxhetit nga shumica e djathtë. Në shkresën e dërguar prefektit, kreu i bashkisë ka nënvizuar se janë shkelur tre ligje të rëndësishme, që po mbajnë peng prej muajsh investimet në qytet. Ato konsistojnë, sipas tij, në nismën për nxjerrjen e akteve administrative, me të drejtën për propozimin e ndryshimeve në strukturat e qeverisjes vendore, si dhe me procedurat e zbardhjes së vendimeve siç është buxheti.

FIER- Mes akuzave e debateve ka dështuar sërish tentativa për kompromis mes këshilltarëve në Bashkinë e Fierit në lidhje me projekt/buxhetin e këtij viti. Me 18 vota pro, këshilltarët e djathtë dhe ata të LSI-së kanë miratuar për të tretën herë projekt/buxhetin e Bashkisë me ndryshimet e kërkuara prej tyre, për kalimin në sipërmarrje private të ndërmarrjes së pastrim-gjelbërimit dhe shkurtimin e personelit të bashkisë me 60 persona. Këto vendime janë kundërshtuar edhe nga kreu i Bashkisë, Baftjar Zeqo i cili e konsideroi miratimin e projekt/buxhetit si antiligjor.
“Nuk është një vendim i drejtë, është në kundërshtim me ligjin” shprehet Zeqo.
Ashtu sikurse thotë edhe kreu i Bashkisë, ecuria në lidhje me projekt/buxhetin do të shihet në 3 mbledhjet e ardhshme të Këshillit Bashkiak.

FIER- Policia Bashkiake e Fierit nuk ka numrin e nevojshëm të policëve për të kontrolluar dhe menaxhuar krejtësisht situatën në qytetin e Fierit. Në varësi nga numri i përgjithshëmi popullsisë në këtë qytet që ka arritur 80 mijë banorë, numri i policëve është tepër i pakët. Me një organikë qesharake, ku një polici i takon problematika e 6500 banorëve nuk mund të bëhet i mundur për të realizuar dhe ndjekur problematikat në këtë rajon. Shefi i Policisë Bashkiake të Fierit, Bashkim Ymeri, thekson se kjo vështirësi bëhet edhe më evidente kur mungon logjistika e duhur. Konkretisht problemet evidente të qytetit të Fierit si zaptimi i trotuareve apo zënia e vendeve publike, duke u shndërruar në treg të fruta-perimeve kanë qenë problematika të përhershme jo vetëm duke penguar kalimtarët, por edhe duke u bërë rrezik për shëndetin e konsumatorëve. “Policia Bashkiake përbën një sërë detyrash të rëndësishme, ndërsa problematikat shtohen, numri i policëve bashkiakë është tejet i vogël vetëm një polic për 6500 banorë, ndërkohë që kemi probleme edhe në logjistikë”. Por me gjithë masat e marra dhe punën e vështirë që bën Policia Bashkiake e Fierit, tregtarët rikthehen sërish në trotuare dhe zaptimi i vendeve publike është dukuri tejet e zakonshme në qytet. Gjithashtu problematika shtohet në zonat rurale ku policët komunarë kanë problematika të tjera në lidhje me pronësisë e tokës, apo grindjeve banale.

Bashkia premton investime gjatë vitit 2009. Ekzistojnë projektet e rikonstruksionit të rrugëve të brendshme

Infrastruktura rrugore në lagjet e qytetit të Fierit mbetet problematika kryesore për komunitetin. Më problematikja është lagjja “Kryengritja e Fierit”, dhe ajo “Liri”, të cilat ndodhen vetëm pak metra larg qendrës së qytetit dhe ngjitur me rrugën kryesore. Janë mbi 4000 banorë të këtyre lagjeve, të cilët janë të izoluar për shkak të shkatërrimit të rrugëve. Vizitori i parë që vjen në këto lagje ndeshet me një infrastrukturë të shkatërruar. Rrugët janë të pakalueshme jo vetëm nga banorët, por edhe nga mjetet e tyre. Ato janë gjithë gropa të mbushura me ujë, puseta të vjedhura, trotuare, të cilët nuk duken si të tillë e që tregojnë se në këto rrugë asnjëherë nuk është investuar. Prej vitesh me radhë, mungojnë investimet e bashkisë për të bërë të mundur zgjidhjen e këtij problemi. Blloqe pallatesh janë bërë problematike prej shumë vitesh, ku kërkesat e banorëve nuk kanë munguar për të përmirësuar situatën. Por nga bashkia nuk janë bërë kanalizimet dhe shtrimi i tyre. Uji dhe balta shkon deri te banesat, ku shpeshherë banorëve u është dashur të ndërhyjnë vet në mënyrë primitive, duke vendosur gurë për t‘u futur në shtëpi. Po në situatë të ngjashme, pa rrugë dhe me baltë deri pranë dyerve të shtëpive, gjenden edhe banorët e lagjes “Liri” të qytetit të Fierit. Te kjo lagje, përveç infrastrukturës së munguar që ka sjellë baltë, dimër e verë mungon edhe ndriçimi. Gjatë orëve të mbrëmjes dhe të natës aty është e vështirë të kalosh. Kreu i Bashkisë, Baftjar Zeqaj, jo vetëm që ka pranuar me keqardhje mungesën e investimeve në këto segmente dytësore të lagjeve qendrore të Fierit, por ka pohuar se “investimi në këto rrugë është i vonuar”. Sipas tij, rruga e lagjes “Liri” dhe “Kryengritja e Fierit” do të rikonstruktohen gjatë muajit shkurt. Për këto dy lagje ekzistojnë projektet në zyrën e zhvillimit të Bashkisë dhe në buxhetin e vitit 2009 është parashikuar ndërhyrja me investime.

Qeveria nuk financon projektet për pjesën më të amortizuar të rrugës Fier-Berat. Bashkia e Roskovecit ka vendosur të ndërhyjë për rikonstruksionin e rrugës kryesore të qytetit, edhe pse ajo bën pjesë në segmentin e rrugës kombëtare Fier-Berat. Një pjesë e këtij aksi rrugor përshkon mes përmes qytetin e Roskovecit, që ndodhet rreth 12 kilometra larg nga Fieri dhe afro 17 kilometra larg Beratit. Drejtuesit e njësisë vendore të Roskovecit kanë pritur tre vjet nga qeveria që ajo të lëvronte fonde për rikonstruksionin e rrugës. Por më në fund kanë vendosur ta rikonstruktojnë vetë atë. Lajmi konfirmohet nga sekretari i këshillit të Bashkisë Roskovec, Koli Xhixho, i cili shprehet për gazetën “Shqip” se me gjithë mungesën e kreut të bashkisë, Ylli Kola, i cili është për arsye shëndetësore në Amerikë prej katër muajsh, projektet kanë njohur rrugën e zbatimit dhe asnjë prej tyre nuk është penguar për faktin e mungesës së kryetarit. “I kemi prezantuar qeverisë disa herë projektin e rrugës kryesore të qytetit, e cila si në kohë me diell dhe në kohë me shi është një pengesë e madhe jo vetëm për komunitetin e qytezës së Roskovecit, por edhe të shumë drejtuesve të automjeteve që shkojnë në më shumë se 30 fshatra të Rrethit të Fierit. Gjithashtu, vështirësi për të kaluar në rrugën kryesore të Roskovecit kanë edhe drejtuesit e makinave që shkojnë drejt Beratit e më tej Skraparit e Çorovodës. Rruga kryesore e Roskovecit bën pjesë në rrugën kombëtare, por nuk ka gëzuar deri më sot asnjë atribut të statusit të saj, duke u lënë kështu e braktisur dhe pa ndërhyrje dhe fonde rikonstruksioni”, thotë për gazetën sekretari i këshillit të bashkisë, Koli Xhixho.

Vendimi për të ndërhyrë në këtë segment rrugor, që është afro 1.2 km i gjatë, është marrë në këshillin e bashkisë, i cili ka vendosur që në fillim të vitit 2009 të nisë nga rikonstruksioni rruga në fjalë. Në projekt, fondet e të cilit do të lëshohen nga të ardhurat e bashkisë, është parashikuar jo vetëm rikonstruksioni që duhet kryer në mënyrë të menjëhershme, por edhe kanalizimet e ujërave të zeza e të bardha si dhe ndriçimi dhe gjelbërimi. Ndërkohë, drejtoria e përgjithshme e rrugëve e ka shmangur këtë pjesë rruge që është në inventarin e saj. “Duke vlerësuar ankesat me të drejtë të komunitetit, i cili dimër e verë përmbytet dhe ndjen vështirësi kur kalon në qendër të qytetit, si dhe ankesat e kryera nga shumë drejtues automjetesh, këshilli bashkiak ka vendosur të zbatojë me fondet e veta projektin e rikonstruksionit të aksit në fjalë”, sqaron Xhixho.

Sekretari i këshillit të bashkisë thotë gjithashtu se largimi i kreut të bashkisë, Ylli Kola, në Amerikë, nuk e ka penguar këtë njësi vendore që të çojë më përpara projektet.