Kryeministri Sali Berisha deklaroi se me liderin historik të së majtës Fatos Nano nuk ka diskutuar për çështjet e Presidencës. Pse duhet bërë kjo në një takim privat me Nanon? Çfarë biseduat me të? Pse mendoni se ka interes opinioni të dijë se ju keni takuar ish kryeministrin? A jeni duke i dhënë argumente tezës së kryetarit të PS se ju dhe Nano jeni një?
Absolutisht, jo. Nuk është kurrë e vërtetë që ne jemi një, Fatos Nano është Fatos Nano. Është lideri historik i të majtës shqiptare. Sali Berisha ka udhëhequr dhe vazhdon të udhëheqë jashtë historisë të djathtën shqiptare, kjo nuk ndryshon. Po nuk ndryshon asgjë më nga vendosmëria për të vlerësuar te kundërshtari për të qene objektiv në vlerësimin e tij, këtë e kam bërë me Nanon dhe me Ramën. Kudo e kam thënë, kam bërë reformat më të thella që mund të kem bërë me opozitën shqiptare. I kam bërë me sensin e kompromisit, konsensusit, nuk e mohoj atë. Por vjen një moment historik për vendin, moment kur vendimet e mëdha, dhe opozita në vend që të jetë në krah të këtyre vendimeve, opozita gjendet aty ku nuk duhet të jetë. Nuk është formë vetëm partia. Për Edi Ramën dhe PS sigurisht formë është kritika ndaj Qeverisë dhe kontributi në procesin e integrimit dhe liberalizimin e vizave, përgjigjet e pyetësorit të integrimit të vendit dhe për këto i kanë dyert të hapura për të kontribuar në gjithsecilin prej tyre.
A do jetë Fatos Nano presidenti i ardhshëm i Shqipërisë? Apo folët për zgjedhjet e ardhshme lokale. Ai ka thëne se do të jetë kandidat kundër Rames?
Po më bën një pyetje jashtë çdo lloj konteksti. Absolutisht në atë tryezë nuk është shqipëruar fjala president deri sot. Po, në atë tryezë nuk mund të mos theksoj se ky takim u zhvillua 20 vite pas Triestes. U diskutua për procesin e integrimit dhe unë si një ish-kryeministër e njoha atë me të gjithë brendinë e takimeve të mia në Bruksel, çka ishte shumë normale në këtë moment. Doja të ftoja dhe shefin e opozitës, po ai me qëndrimin që mban i kundërvihet në mënyrën më të hapur. Në momentin që unë takoja presidentin e KE, ata vishnin ferexhe.
Folët për zgjedhjet e ardhshme lokale me zotin Nano?
Unë nuk diskutova për planet personale apo partiake të zotit Nano ato nuk janë çështje diskutimi mes nesh. Diskutova për perspektivën evropiane të Shqipërisë.
Do e mbështesni kandidaturën e zotit Nano për zgjedhje apo presidence?
Unë jam një ish president. Lëndohem shumë kur gazetarët fillojnë diskutimet për kandidatin e Presidentit dy apo tre vjet para. Nuk është as etike, nuk i shërben as dhe një institucioni të nderuar qendror për vendin që është Presidenca. Nuk kam ndërmend të bëj as dhe diskutimin më të vogël, unë jam ish president. Nuk më lejohet mua të fillojë diskutimet apo premtime para datës kushtetuese të fillimit të procesit të zgjedhjes së presidentit.
Do futeni në zgjedhje të vetëm?
Problemi im është të krijoj kushte përzgjedhjeje. Marrin apo s’marrin pjesë në zgjedhje këtë e përcakton çdo forcë politike në qëndrimin e saj. Unë kam për detyrë të krijoj të gjitha kushtet ligjore siç bëra më 28 qershor.
Kur mendoni se duhen bërë zgjedhje të parakohshme?
Kushtetuta ka të gjithë përcaktimet e veta. Gjer sot ky është koalicioni më funksionues. Kjo është qeverisja me e konsoliduar. Në historinë e vendit nuk ka pasur kurrë një intensitet reformash siç ka pasur këto 8 muaj. Nuk kemi regjistruar kurrë rezultate të lakmueshme sa këto 8 muaj. Është kjo qeverisje që bëri që ekonomia shqiptare e vendosur në binarë të shëndoshë këto tre muaj të fillojë një ngjitje.
Po përgatiteni për zgjedhje lokale?
Ku ta gjej Ramën unë? Nuk keni marrë vesh ju që të gjitha këto i bën për të mos kandiduar. Uroj të kandidojë se do gjeja jo një po dy kandidatë. Po druaj se e gjitha kjo që po ndodh, po perifrazoj, një mik të shquar të PS në një forum. Tha: Fjala është për kutitë, po thelbi është për 2011, për zgjedhje që s’duan të marrin pjesë. Unë uroj të jetë i gabuar miku i Ramës.
Keni një emër për Tiranën?
Si s’kemi ne emër për Tiranën. Do të përcaktohet për emra, kemi emra personalitetesh, i ofrojmë Tiranës program dhe kandidat, ne jemi të bindur se koalicioni me LSI-në për Tiranën do e fitojë.
Opozita tha se ajo do të protestojë dhe në 1 maj ditën kur ju keni deklaruar një miting të madh festiv për të nderuar punën. Ç’do të ndodhë, do të jenë të dyja palët në bulevard njëra ne feste e tjetra në protestë?
Rrugët dhe sheshet e Tiranës mjaftojnë dy herë për opozitën dhe dy herë për Qeverinë. Secili në mënyrën e tij për 1 maj. Ne kemi vendosur, i ofrojmë koncert dhe kaq.
Kur do rinovohen strukturat e PD?
Së shpejti do bëhen votimet, forumet janë. E dyta, rëndësi të madhe ka shumë, sepse në katër vitet e para PD qeverisi dhe u kuotua nga shqiptarët dhe komuniteti ndërkombëtar. Një grup i tërë u përgatit dhe ai grup sot është i shpërndarë në kabinete dhe Parlament. Të tjerë janë duke ardhur në horizont. Dhe unë këtë e konsideroj shumë të rëndësishme.
Do të ndahen postet partiake nga ato qeveritare?
Do ndahen e s’do ndahen. A do jemi përfundimtar me këtë parim? Edhe mund të jemi. Do jetë çështje e Këshillit Kombëtar. Nëse Këshilli Kombëtar vendos për ndarjen e tyre, do ndahen. Sepse unë nuk mund të them se ky post e bën vetëm filani dhe askush tjetër, nuk e pranoj. Ne në garë ecim me disa kandidatura, dhe kurrë me një kandidaturë.
Ju për kë variant jeni?
Më mirë të mos ndikoj te anëtarësia e Këshillit, të bëj diskutim për të dy variantet dhe të vendosë. Nuk mund të them se varianti që ekziston ishte i dështuar, ky variant u kurorëzua me fitore. Le të ketë debat.
A ka mendim ndryshe brenda PD-së?
Unë mendoj se PD ka dëshmuar forcën më të madhe të rinovimit bazuar në meritën dhe po të vështrosh mbi të do gjesh një tërësi personalitetesh të cilët janë afruar njëri me tjetrin jo për shkak të një përkatësie të dikurshme, jo për shkak të një krahine, për asnjë shkak tjetër përveç të besimit të një programi të caktuar dhe vlerave të përbashkëta të kësaj. Për ta mbyll këtë se në aspektin e burimit njerëzor, PD sot është në kuotat më të larta në historinë e saj.
Opozita thotë se jeni një lider autoritar…
Midis një lideri normal dhe një lideri të dobët, cilin do zgjidhje? Një lider i dobët për çfarë do të duhej? Një lider hamletian që vërtitet gjithë ditën me alternativën të bëj apo mos bëj, të vendos apo mos vendos, ishte në vendin e gabuar. Unë jam një lider vendimmarrës këtë nuk e mohoj, jeta ime ka qenë vendime.
Si e konsideroni bashkëpunimin me zotin Meta?
Meta dhe LSI solli vlera reale në këtë qeverisje. Mendoj se bashkëpunimi ka qenë shumë i mirë. Dua t’iu siguroj një gjë që Sali Berisha, dhe mund t’iu vijë çudi, nuk bën asnjë dallim ndaj atij ministri që i përket PD dhe ministrit që i përket LSI apo ministrave që u përkisnin partive të tjera, dhe unë këtë e kam dëshmuar. Unë punoj në ekip, jeta ime ka qenë punë ekip.
Do e formatoni Qeverinë?
Nuk ka asnjë shkak për ndryshime në kabinet, po funksionon normalisht.
Cili është vlerësimi juaj për punën e Prokurorisë?
Vlerësimi im në tërësi është pozitiv. Sot në Shqipëri ka një trupë të Gjykatës dhe Prokurorisë së Krimeve të Rënda që bëjnë një punë të admirueshme dhe unë kam pasur këtë admirim dhe kur kam qenë opozitë ndaj tyre. Sepse këta burra dhe gra, punojnë me një përkushtim të madh, me një guxim të madh dhe në fusha më delikate. Ka një task-force, në kryeqytet e cila hapi një kapitull të ri në historinë e luftës kundër korrupsionit në këtë vend pavarësisht nga simetrizmi i kësaj lufte po unë e përshëndes. Ndihem i rënduar nga sulmi frontal që i bëhet këtij sistemi apo gjykatave. Ka gjykatës dhe prokurorë të ndershëm të përkushtuar. Është e vërtetë që kanë pasur problem serioz, dhe problem serioz ishte se ekzistonte imuniteti në sistemin e tyre ndaj dhunuesve të ligjit, por ka filluar, sot ka gjykatës të arrestuar, prokurorë të arrestuar.

Prifti: Votoj Nanon për President
Nëse maxhoranca e djathtë do të propozonte liderin e së majtës Fatos Nano për të qenë President i Republikës, ministri i Ekonomisë dhe Energjitikës, Dritan Prifti do të votonte pro tij. Deklarata e ministrit të LSI-së u pohua mbrëmë gjatë emisionit “Ora e Intervistës” nga gazetari Alfred Peza në Ora News. Në lidhje me takimin Nano-Berisha në Vjenë, Prifti tha se: “Ishte një takim normal mes dy personaliteteve politike të këtij vendi. Nano është i ri, akoma nuk ka mbushur 55 vjeë dhe mund të japë kontribute të tjera në politikë shqiptare”. Prifti tha se nëse maxhoranca, pra PD dhe LSI do ta propozjnë Nanon si një kandidaturë të përbahskët për President, edhe ai do të votonte pro kandidaturës së tij. “Nëse maxhoranca dhe LSI e voton, edhe unë do votoj për Nanon President”, tha Prifti. Deputeti i LSI-së në zgjedhjet e fundit presidenciale në vitin 2007 shkoi në Kuvend për të votuar kundër kandidaturës së Fatos Nanos për President, por tashmë ai deklaron se marrëdhëniet e tij me liderin e së majtës janë normale. “Tani janë normale dhe i kemi lënë pas probleme e së shkuarës. Jam takuar me zotin Nano para rreth 10 ditësh në Tiranë”, shtoi Prifti.

Berisha: në një moment historik për vendin, do të ftoja liderin historik të së majtës shqiptare për një takim, i cili kishte disa arsye.

Kështu do ta niste sqarimin e tij publik gjatë konferencës për shtyp, kryeministri Sali Berisha, lidhur me takimin që bëri me ish-kryeministrin socialist Fatos Nano në Vjenë, rrugës së gjatë me makinë nga Brukseli në Tiranë.

Nuk mund ta anashkaloja Fatos Nanon pa e takuar në këtë moment historik për vendin. Lideri historik i së majtës shqiptare, pavarësisht se ku ndodhet, ka meritat e tij dhe askush nuk mund tia mohojë, sqaroi Berisha për takimin i cili zgjoi kërshërinë e gjithë opinionit publik fundjavën që sapo kaloi.

Më tej, Berisha tha se ishte pikërisht Fatos Nano ai që e mori Partinë e Punës së Shqipërisë të kryesuar nga një njeri për 50 vjet me radhë dhe e ktheu atë në një parti që e zgjodhi kryetarin edhe anëtar të thjeshtë, siç ishte ai vetë.

Nano e anëtarësoi Partinë Socialiste në Internacionalen Socialiste, ndërsa në vitin 2005, ai me një qëndrim dinjitoz mbajti fjalën që u kishte dhënë mbështetësve të tij se do të dorëhiqej pas humbjes, duke dhënë një standard të qytetëruar të politikës shqiptare, vijoi rrëfimin e tij Berisha, rreth takimit me ish-kryeministrin Fatos Nano.

Duke përfunduar me fjalët dhe vlerësimin se duke takuar Nanon, ka shprehur respekt për të majtën shqiptare në proceset integruese të vendit dhe prandaj e quan për detyrë të bëjë transparencën e këtij takimi i cili zhvillohej në një darkë, 20 vjet pas darkës së përbashkët në Trieste.

Por në konferencën e tij për shtyp pasditen e sotme, Berisha tha edhe se marrëveshjet e mia me Nanon, i kanë shërbyer vendit.

Kurse duke folur për udhëtimin tha se ai ishte siamez me integrimin në BE.

Në argumentin e liberalizimit të vizave për shqiptarët në zonën Shengen të Bashkimit Evropian, z.Berisha tha se i kishte Barrosos se nuk duam favore, por vlerësim të drejtë.

Nga ana tjetër, Berisha veçoi se momenti i dorëzimit të Pyetësorit, solemn dhe emocionues.

Dhe duke u ndaluar në takimet e Brukselit, Kryeministri citoi se Fule kërkoi funksionim të parlamentit shqiptar.

n.e/NOA

TIRANË- Kryeministri Sali Berisha dhe zonja e tij Liri Berisha u pritën sot rreth orës 11:00 në një audiencë të posaçme në Vatikan nga Shënjtëria e tij, Papa Benedikti i 16- të, me të cilin pati një takim shumë të ngrohtë dhe të përzemërt, njoftoi faqja zyrtare për shtyp e Kryeministrit.
Pas takimit me Papa Benedikti i 16-të, Kryeministri Berisha e cilësoi këtë “një ditë të paharruar pasi kjo ditë koinçidon me 12 dhjetorin e vitit 1466, vit kur Papa Pali i Dytë priti në audiencë Gjergj Kastriot Skëndërbeun.

“Sot e 543 vjet më parë, më 12 dhjetor, prijësi i përjetshëm i kombit shqiptar, Skënderbeu u prit në Vatikan, nga Papa Pali II. Ai erdhi këtu për të kërkuar dhe gjeti mbështetje në përpjekjet e tij legjendare, për të mbrojtur vokacionin perëndimor të kombit shqiptar, vlerat e mëdha të perëndimit në rajon kundër invadorëve. Nuk besoj se do të mund të ishte gjetur gjë e më e bukur, gjë më domethënëse në jetën time, për mua dhe shqiptarët, se sa kjo audiencë, kjo pritje që më akordohet më 12 dhjetor, në këtë përvjetor të madh të marrëdhënieve të Shqipërisë me Selinë e Shenjtë. Edhe një herë, një mirënjohje shumë të thellë Atit të Shenjtë për audiencën që më akordoi”.

Nga të njëjtat burime mësohet se Kryeministri i shprehu Papa Benediktit të 16-të, mirënjohjen e thellë të tij, qeverisë shqiptare dhe mbarë kombit shqiptar për mbështetjen e madhe që Selia e Shenjtë i ka dhënë konsolidimit të demokracisë në Shqipëri, zhvillimit ekonomik dhe kulturor të saj, që nga fillimet e demokracisë dhe deri më sot.

Kryeministri Berisha i dorëzoi Papa Benediktit të 16 ftesën për një vizitë në Shqipëri, vitin e ardhshëm, në 100 vjetorin e lindjes së shqiptares së madhe Nënë Tereza.
“Papa Benedikti i 16-të u shpreh se, Selia e Shenjtë do të mbështesë plotësisht integrimin e Shqipërisë në Bashkimin Evropian dhe zhvillimin e Shqipërisë në të gjitha fushat” bën të ditur njoftimi në faqen e kryeministrisë.
Në kuadër të vizitës zyrtare në Vatikan, Kryeministri Berisha zhvilloi edhe një takim me Sekretarin e Shtetit të Vatikanit, Kardinalin Tarcisio Bertone.

TIRANË-Negociatat për qeverinë e re vijuan sot me takimin mes kryetarit të Partisë Republikane, Fatmir Mediu dhe kryeministrit Sali Berisha, njëkohësisht kryetar i Partisë Demokratike. Pas takimit dypalësh të zhvilluar në selinë e Kryeministrisë, Mediu tha për mediat “se i paraqiti kryeministrit kërkesat e PR-së lidhur me formatimin e kabinetit të ri qeverisës.
“Ne do të ecim në logjikën e proporcioneve të votave, si ka deklaruar dhe kryeministri, por në vlerën që përfaqëson PR brenda koalicionit të djathtë. Ende nuk është vendosur asgjë dhe para se t’i bëj të qarta vendimet në opinion publik do t’i diskutoj ato me kolegët e kryesisë së PR-së”, tha Mediu për gazetarët, pa pranuar të japë detaje të tjera rreth takimit.
Ai është treguar i rezervuar, duke theksuar se gjithçka që do të vendoset do të jetë vendim që do të dalë nga kryesia e partisë që drejton. “Ne do të mbledhim kryesinë e cila do të marrë qëndrimin e saj për propozimin e kryeministrit për t’u përfaqësuar në qeveri”- tha më tej ai.
PR, një nga aleatët më të ngushtë të PD-së, në zgjedhjet e 28 qershorit mundi të sigurojë një mandat deputeti.

Kryeministri Sali Berisha Berisha do te detyrohet te mos i permbahet premtimit te dhene disa dite me pare per shpalljen e kabinetit te ri perpara dates 7 shtator, te henen kur mblidhet per here te pare Kuvendi i ri.

Top Channel ka mesuar se kryeministri Berisha do ta beje kete pas nisjes se punimeve te legjislatures se re parlamentare.

Cka do te thote se per shpalljen e kabinetit te ri qeveritar do te duhen te pakten edhe 5 dite, rreth dates 8 ose 9 shtator, gje qe koincidon me kohen kur ai do te paraqese para parlamentit programin dhe perberjen e re te keshillit te ministrave.

Nga ana tjeter kjo do te thote se do te zgjase edhe per disa dite ankthi mes radheve te demokrateve se cilet prej tyre do te mbeten ne postet ministrore, cilet do te ikin dhe cilet do te jene te rinjte.

Nga komunikimet me disa prej figurave kryesore te Partise Demokratike, Top Channel ka mesuar se asnje prej tyre nuk eshte kontaktuar ende nga kryeministri Berisha.

Gje qe i kufizon ata edhe te kene hamendje per postet qe mund te kene apo jo. E sigurt eshte se kreu i qeverise po llogarit deri ne detaje ekuilibrat brenda partise dhe qeverise me emerimet qe ai mund te beje dhe se sot, 4 dite pas konferences se shtypit, mbetet aktuale njera nga pergjigjet e kryeministrit per gazetaret, se cilet do te jene emrat e ministrave.

Ne fakt perpara se te vendose se kush do te jete ku nga partia e tij, kryeministrit Berisha i duhet te prese nje pergjigje, natyrisht pozitive, per pjesemarrjen ne kabinet te aleateve republikane.

Per rreth nje ore zoti Berisha eshte takuar ne zyren e tij me kryetarin Fatmir Mediu, sipas te cilit kryeministri i ka ofruar disa propozime konkrete.

Zoti Mediu nuk pranoi t’i thote propozimet, por la te kuptohej se kryesia do te vendose per njerin prej tyre.

“Do te ecim me logjiken e proporcioneve. Nuk ka asgje te percaktuar dhe fillimisht do te kete diskutime me koleget. Elektoralisht Partia Republikane ka kontributin e saj dhe brenda kesaj logjike do te kerkojme te kemi perfaqesimin tone”, u shpreh Mediu.

Kryesise se Partise Republikane i duhet te vendose edhe per emrin e saj perfaqesues ne qeveri dhe zoti Mediu nuk e perjashtoi veten e tij nga ky vendim.

“Jam kryetar i Partise Republikane dhe deputet dhe askush nuk do te vere ne dyshim perfaqesimin politik”, u shpreh Mediu.

Per republikanet perflitet Ministria e Mjedisit, por deri tani, jo vetem per republikanet, por edhe per demokratet, gjithcka eshte vetem hamendje dhe zera, qe me shumti vijne nga korridoret e interesuara per pushtetin.

Kryeministri Sali Berisha dhe kreu i LSI-se, Ilir Meta, do te takohen pasditen e sotme ne oren 18:30 ne Kryesine e Kuvendit. Sot pritet te marre fund gjithashtu edhe dilema nese Ilir Meta, perveç pozicionit te zv/kryeministrit, do te ulet ne karrigen e shefit te diplomacise, apo te ministrit te Brendshem.

Ministria e Shendetesise dhe Ministria e Ekonomise, Tregtise dhe Energjetikes jane dy “portofolat” e tjere te kerkuar nga Levizja Socialiste per Integrim.

LSI ka pergatitur programin dhe tashme pritet vetem marreveshja per bashkepunimin me Partine Demokratike per qeverisjen e vendit ne kater vitet e ardhshme, e cila do te firmoset sot.

Pas takimit me Meten, Kryeministri Berisha do te pershkallezoje negociatat edhe me aleatet e tjere, si republikanet dhe Partine per Drejtesi dhe Integrim. E ftuar per negociata eshte edhe Partia Bashkimi per te Drejtat e Njeriut. Qeveria e re pritet te pagezohet me emrin “qeveria e integrimit europian”.

Kjo nuk eshte qeveria e pare ku nje force e djathte bashkepunon me nje parti te spektrit te majte. Pas qeverise se stabilitetit, 18 vjet me pare dhe qeverise se pajtimit kombetar perpara 12 vjetesh, viti 2009 do ta gjeje vendin me nje Kryeminister te djathte, i cili eshte kushtezuar per te pranuar ne qeveri nje parti te majte.

Kabineti i ri pritet te jete qeveria e trete e perbashket midis te majteve dhe te djathteve, pas qeverise se stabilitetit ne vitin 1991 dhe asaj te pajtimit kombetar ne vitin 1997, qeveri te cilat jane perfolur mjaft per bashkepunimin midis te majtes dhe te djathtes.

Paraprakisht duket se jane qartesuar pikat e marreveshjes se pritshme per bashkeqeverisje midis PD dhe LSI. Mesohet se Kryeministri ka rene dakord t’i ofroje kesaj partie tre poste ministrore dhe nje numer te konsiderueshem zv/ministrash. Po sipas burimeve eshte rene dakord qe posti i pare te jete ai i ministrit te Ekonomise.

Emri me i gatshem per te marre persiper drejtimin e ketij dikasteri eshte ai i deputetit Dritan Prifti. Sakaq, nje tjeter kabinet ministror mesohet se do te jete Ministria e Jashtme. Kjo e shoqeruar bashke me postin e zevendeskryeministrit. Ato pritet te mbahen nga kryetari i partise, Ilir Meta.

Posti tjeter ministror eshte Ministria e Shendetesise. Mesohet se gjate diskutimeve eshte rene dakord qe perfaqesimi ne kete nivel qeverisjeje te shkoje nga 5 deri ne 7 poste zevendesministrore. Gama e perfaqesimit ne kete nivel do te jete sipas fushave te ndryshme, ku ka prioritetet programore Levizja Socialiste per Integrim.

Mbremjen e se merkures do te qartesohet gjithçka dhe ne takim pritet te jete edhe nenkryetarja e PD-se, Jozefina Topalli, ose sekretari i Pergjithshem i PD-se, Ridvan Bode, dhe sekretari i Pergjithshem i LSI-se, Petrit Vasili.

Nje sukses, Por, kabineti ri do jetë kompleks, jane fjalet qe Kryeministri i Shqiperise Sali Berisha citoji ne mbledhjen e fundit te qeverise.
Mbyllet Qeveria “2005”. Berisha: Nje sukses. Por, kabineti ri do jetë kompleks

• I jane dashur vetem 25 minuta kryeministrit Berisha qe te permbledhe punen e qeverise 2005-2009. Ne prag te zyrtarizimit te kabinetit te ri, qe sipas Berishes “do jepet plot me supriza”, kryeministri theksoi reformat me te medha qe shenoi vendi yne ne planin diplomatik, ekonomik, politik.

TIRANE-Qeveria Berisha mbylli mandatin sot në mesditë për ti hapur rrugë krijimit të qeverisë së re, frut i zgjedhjeve parlamentare të 28 Qershorit. Në një mbledhje të fundit me ministrat e tij që zgjati plot 25 minuta, Berisha bëri nj analizë të qeverisë së tij 2005-2009, ndërsa theksoi se qeveria e re do të jetë plot me surpriza.
Në mbledhjen e fundit të këtij kabineti qeveritar sot në mesditë, kryeministri Sali Berisha tha se këto katër vite ishin vitet e reformave të mëdha në vend. Në mbledhjen e sotme, Berisha ka analizuar reformat e ndërmarra në çdo sektor, duke theksuar në aspektin e integrimit, veçanërisht anëtarësimin e Shqipërisë në NATO. Sipas Berishës, kompakte dhe e suksesshme ishte arritja më e madhe e qeverisë së tij, anëtarësimi në NATO. Duke folur në planin diplomatik, ai konsideroi si arritje të madhe, punën e bërë nga qeveria e tij për shpalljen e pavarësisë së Kosovës. Në aspektin ekonomik, Berisha vecoi rritjen e madhe të pagave kurse në infrastrukturë, sic cilësoi kryeministri “ndërtimin e rrugës së artit, autostradën Durrës-Kukës-Morinë që ka shënuar një sukses tjetër të madh të qeverisë”.
Qeveria në mbledhjen e sotme ka marrë vendim për rialokimin e fondeve në buxhet. Sipas kryeministrit, një vendim i tillë merret për të mos lejuar falsifikimet në investime.

Gjatë analizës 25 minutëshe, Kryeministri ka folur edhe për krijimin e qeverisë së re që pritet të zyrtarizohet sot pasdite rreth orës 18:30 minuta. Duke folur për qeverinë e re, Berisha tha se kompozimi i kabinetit do të jetë kompleks, tashmë kur pranë PD-së është ofruar edhe Lëvizja Socialiste për Integrim. Kjo është arsyeja theksoi Berisha që disa ministra që sot janë të ulur në karriget e kabinetit qeveritar, nuk do të jenë më. Duke shprehur mirënjohjen ndaj ministrave që nuk do të jenë më ministra Berisha vuri në dukej se kjo nuk do të thotë se ata nuk kanë punuar. Arsyet që më detyrojnë të bëj ndryshime është se kompozimi i qeverisë së dytë do të jetë edhe më komplekse”.
Madje në batutat që hodhi me gazetarët, Berisha shtoi se nuk do të bëjë të ditur momentalisht asnjë emer të ri, pasi vetëm pak orë e ndajnë median nga surprizat që do të ketë kabineti i ri
Sipas Berishës po sot në mbrëmje ai do të bëjë të ditur edhe prioritetet që do të ndjekë qeveria e re gjatë punës së saj 4 vjecare.

Kryetari i PS, Edi Rama ne fjalimin e tij ne kongresin e jashtezakonshem te partise ka kritikuar ashper kryeministrin Sali Berisha per manipulimin qe sipas tij ai i beri procesit zgjedhor.

Rama ka theksuar se PS i mori votat e duhura per te ardhur ne pushtet, por i humbi ato per shkak te “krimit mafioz” te kryeministrit.

“Kete dite do ta kishim dashur ndryshe. Do te na kishte pelqyer qe sot te mblidheshim per te festuar fitoren dhe per te filluar rrugen e re te ndryshimit teresor. Shqiperise i duhej ndryshimi. Shqiptaret erdhen si asnjehere ne sheshet e betejes sone elektorale, duke na votuar masivisht. Por kjo nuk mjaftoi. Historia u perserit ashtu sic i trembeshim. Berisha do t’i vidhte te gjitha votat qe i duheshin. Kjo eshte nje e vertete e hidhur”, ka pohuar Rama.

Kreu i PS ka kritikuar ashper edhe kryetarin e LSI, Ilir Meta, i cili sipas tij kreu nje “horrllek” duke u bashkuar me koalicionin e PD.

“Shumica e zgjedhesve votuan per largimin e Berishes nga pushteti dhe megjithe deformimin e rende, Berisha nuk do te behej kurre kryeminister sikur Ilir Meta te mos bente horrllekun qe ne kishim paralajmeruar me pare”, ka theksuar Rama, i cili e ka cilesuar Berishen si “kryeministrin e fundit komunist” te vendit.

Me tej, duke konfirmuar kandidimin e tij per kryetar te PS, Rama ka paralajmeruar se do te nise nje lufte per kthimin e kesaj force ne pushtet, ne menyre qe te sjelle ndryshimin e kerkuar nga shqiptaret, por qe u mor peng nga Berisha dhe klani i tij.

“Do filloj nje lufte per ardhjen e PS ne pushtet, per te punuar dhe sakrifikuar edhe me shume ne krye te kesaj partie. Shqiperia eshte marre peng nga nje pushtet i bere njesh me shtetin, qe nxorri zgjedhjet jashte standarteve demokratike”, ka theksuar Rama.

Rikandidimin e tij per kryetar te PS, ai e ka justifikuar duke nenvizuar se projekti i tij nuk humbi ne zgjedhje, por u spostua nga vjedhjet e kryeministrit.

“Arsyeja perse une sot jam vene ne dispozicionin tuaj per te udhehequr PS ne vitet e ardhshme eshte se ne zgjedhjet e 28 qershorit nuk humbi projekti politik qe une udhehoqa. Une kam nje detyrim ndaj te gjithe atyre socialisteve qe e nxorren PS forcen e pare ne vendin tone”, ka shtuar Rama.

Kryeministri Sali Berisha ka deklaruar sot se kabineti i tij do te rishqyrtoje buxhetin e ketij viti. Gjate mbledhjes se rregullt te qeverise, kryeministri ka preferuar te theksoje se gjate ketij viti te ardhurat u rriten ndjeshem dhe ka hedhur poshte pretendimet e PS se ka kryer investime elektorale.

“Do rishqyrtojme buxhetin e ketij viti. S’kemi bere investime elektorale. Pavaresisht efekteve te krizes, te ardhurat u rriten kete vit me 7%”, ka pohuar Berisha.

Kryeministri e ka argumentuar rritjen e deficitit buxhetor me punen e dobet qe kane bere sipas tij tatimet dhe doganat, nderkohe qe ka premtuar uljen e tij.

“Deficiti u rrit nga puna jo e mire e tatimeve dhe doganave qe shkaktuan 165 milione dollare humbje. Zotohem se kete vit deficiti s’do te kaloje 4.2 per qind, nderkohe qe ne 2012-en do te jete 3%”, ka shtuar Berisha.

Selia rozë ka paralajmëruar përkeqësim të situatës në qytetin e Fierit. PS, thirrje Berishës: Hiq dorë nga mandati i nëntë
TIRANË- Selia rozë i kërkon qeverisë dhe kryeministrit Berisha që të ndalë menjëherë fushatën ndëshkimore ndaj të gjithë simpatizantëve të saj në qarkun e Fierit, që morën pjesë në revoltën e disa ditëve më parë për ruajtjen e votës.

Duke marrë shkas pikërisht nga aksionet policore që kanë ndodhur gjatë natës së shkuar në qytetin e Fierit, kandidatja për deputete e PS-së për këtë qark, Ermelinda Meksi, nëpërmjet një komunikimi të posaçëm me mediat i ka konsideruar këto zhvillime si një hakmarrje politike për mosbindjen që qytetarët e kësaj zone shprehen në mbrëmjen e datës 1 korrik, ku në mbrojtje të votës nga manipulimi u përballën edhe me forcat e rendit. “I kërkojmë Sali Berishës të heqë dorë urgjentisht nga raprezaljet ndaj anëtarëve dhe simpatizantëve të PS, raprezalje që kanë vazhduar gjatë gjithë natës në Fier nga policia”, – tha Meksi.
Ajo i ka bërë thirrje Berishës, që të mos provokojë qytetarët e Fierit, pasi veprime të tilla mund të sjellin revolta qytetare. “Çdo veprim tjetër është një provokim i rëndë për elektoratin fierak, që mund ta nxjerrë situatën jashtë kontrollit dhe përgjegjësi i saj është Sali Berisha dhe KQZ e urdhëruar prej tij”, – theksoi Meksi. Ndërkohë, selia rozë ka denoncuar edhe një herë përpjekjet e mazhorancës së djathtë për të manipuluar verdiktin e qytetarëve të qarkut të Fierit nëpërmjet KQZ-së, që ajo e ka konsideruar si masha e kryeministrit Berisha. Sipas Meksit, PS është e vendosur të mbrojë deri në fund mandatin e nëntë të deputetit në Fier dhe nuk do të lejojë që vota popullore të transformohet. “I kërkojmë KQZ-së, që në respekt të ligjit të mos zvarrisë numërimin e kutive të panumëruara të Fierit. I kujtojmë KQZ-së se nenet 116 -119 të Kodit Zgjedhor imponojnë në mënyrë kategorike numërimin e çdo kutie e cila është marrë në dorëzim të rregullt nga KZZ, siç është rasti i 9 kutive që ende sot mbeten në ambientet e KQZ-së të pa numëruara”, -shtoi Meksi.
Gjithashtu, ajo ka ftuar faktorin ndërkombëtar që të asistojë nga afër situatën si në qytetin e Fierit ashtu edhe në KQZ ku deri më tani nuk është marrë asnjë vendim lidhur me fatin e 9 kutive të panumëruara që i korrespondojnë 4 KZAZ-ve, 18, 19, 20 dhe 22 në këtë qark. “I bëjmë apel faktorit ndërkombëtar për të monitoruar këtë proces, manipulimi i të cilit filloi në Fier e po vazhdon në KQZ, institucion për të cilin faktori ndërkombëtar ka premtuar garanci dhe monitorim”, – u shpreh Meksi.