Zbulohen detajet e vrasjes në Fier. Nënë e bir shkuan të armatosur për t’u “sqaruar”

Ylli Zeqaj, 48-vjeçari nga Fieri që u gjet i vdekur paraditen e së dielës në banesë, u vra nga djali i tij adoleshent, i cili e ka kryer krimin i shtyrë nga e ëma. Shkak është bërë tentativa e viktimës për të shitur gjysmën e banesës, kur dikur jetonte me ish-bashkëshorten, nga e cila ishte divorcuar një vit më parë. Ky ka qenë konkluzioni që ka nxjerrë Policia e Fierit mbrëmjen vonë të së dielës.
Hetimet

Vetëm nëntë orë hetime i janë dashur Policisë së Fierit për të zbardhur vrasjen e 48-vjeçarit Ylli Zeqaj, i cili u gjet i masakruar me 8 plagë në trup. Telefonata e fundit që viktima kishte kryer me ish-bashkëshorten ka çuar policinë që të dyshojë që në fillim se bëhej fjalë për një krim brenda familjes. Qysh në momentet e para, grupi i hetimit ka marrë në pyetje të afërmit e Ylli Zeqajt, përfshi edhe ish-bashkëshorten, Luljetën, dhe dy djemtë të çiftit të divorcuar prej një viti.

Sipas burimeve të gazetës, brenda grupit hetimor mësohet se gjatë telefonatës së fundit më datë 22 korrik, Luljeta dhe djali i tij e kishin kërcënuar 48-vjeçarin se do ta vrisnin.

Burimet e policisë bëjnë të ditur se Luljeta Zeqaj, ish-bashkëshortja e viktimës, është marrë në pyetje për herë të parë mesditën e së dielës në banesën e saj në lagjen “1 Maji”, ku jetonte pas divorcit me Yllin. Ajo është ripyetur pasditen e së dielës dhe më pas është marrë me furgonin e patrullës policore për t’u shoqëruar në mjediset e komisariatit, ku pas përballjes me provat i janë vënë prangat nën akuzën e vrasjes së kryer me paramendim dhe bashkëpunim.

Bashkë me të policia ka shoqëruar edhe djalin adoleshent, i cili është “tradhtuar” nga hetimet speciale të policisë. Në pritje të zbardhjes së telefonatës së fundit, gjatë përgjimit në dhomat e paraburgimit djali adoleshent ka shfaqur ankth për atë që kishte kryer, ndërsa më pas ka treguar çdo gjë për policinë. Në gjendje të rëndë depresioni, 16-vjeçari ka treguar orë pas ore atë çka kishte kryer ai dhe e ëma më 23 korrik. Në prani të psikologut, policia e ka njohur atë me akuzën, e cila është e njëjtë me të së ëmës. Mësohet se një akuzë tjetër rëndon mbi djalin vrasës. Bëhet fjalë për akuzën e mbajtjes së armëve të ftohta pa leje.
Viktima

Ylli Zeqaj është gjetur i vrarë në shtëpinë e tij nga prindërit dhe vëllezërit mëngjesin e së dielës. Ata ishin njoftuar nga fqinjët se nga brenda shtëpisë në katin e parë të një pallati pesëkatësh vinte erë e keqe. Më pas është njoftuar policia, e cila ka mundur të zbardhë plotësisht krimin e radhës brenda familjes. Viktima njihet prej policisë si person me precedentë penalë. Ai ishte denoncuar në polici nga gruaja për dhunë përpara divorcit. Ceremonia mortore e tij është zhvilluar në fshatin e lindjes në Mallakastër, ku ai është përcjellë për në banesën e fundit nga prindërit, vëllezërit, miqtë dhe të afërmit.

Ylli Zeqaj u masakrua me thikë. Policia arreston ish-gruan dhe djalin 16 vjeç

Një 48-vjeçar nga Fieri është gjetur i masakruar në banesën e tij, ndërkohë që policia ka arrestuar djalin dhe ish-bashkëshorten e tij, të cilët dyshohet se kanë kryer krimin brenda familjes. Viktima, Ylli Zeqaj, është gjetur nga njëri prej djemve mes pellgut të gjakut në banesën e tij në lagjen “Apolonia” të këtij qyteti. 48-vjeçari kishte rreth një vit që ishte divorcuar nga bashkëshortja, me të cilën kishte dy djem.
Ngjarja

Ngjarja e rëndë është konstatuar dje, rreth orës 10.30, ndërsa dyshohet se Ylli Zeqaj është vrarë dy ditë më parë. Burime nga vendi i ngjarjes bëjnë të ditur se 48-vjeçari është gjetur nga i biri, Mariusi, i shtrirë në dysheme, mes një pellgu gjaku. Ai ndodhej në një nga dhomat e shtëpisë dhe nuk shfaqte shenja jete. I biri, i trembur nga skena që ka parë, ka vrapuar në lagjen “Kastriot”, ku banonte gjyshja e tij dhe mes lotëve ka treguar se çfarë kishte parë në shtëpi. Menjëherë drejt banesës së Zeqajt kanë rendur të afërmit, të cilët kanë lajmëruar policinë. Drejt vendit të ngjarjes janë nisur dy automjete të patrullës së përgjithshme të Policisë së Fierit. Uniformat blu kanë bërë ekspertizën dhe trupi i pajetë është dërguar për në morgun e spitalit rajonal të qytetit për t’iu nënshtruar autopsisë.
Hetimet

Nga hetimet paraprake ka rezultuar se 48-vjeçari ka gjetur vdekjen si pasojë e tetë plagëve të thella që dyshohet se janë shkaktuar nga një thikë e gjatë. Sipas burimeve zyrtare të policisë, 48-vjeçari është masakruar disa ditë më parë dhe trupi është gjetur rastësisht nga i biri. Grupi hetimor i ngritur për këtë ngjarje e përqendroi punën te dyshimet për një krim brenda familjes dhe vetëm disa orë pas zbulimit të kufomës arriti të siguronte prova e fakte që tregojnë se vrasja është bërë nga ish-bashkëshortja dhe nga djali 16 vjeç i viktimës.

Hetuesit mësuan nga të afërmit se viktima ka pasur gjatë gjithë kohës grindje me ish-bashkëshorten. Ai prej disa kohësh kishte nxjerrë në shitje shtëpinë dhe ky vendim nuk është mirëpritur nga ish-gruaja, e cila kishte të drejta pronësie. Pas divorcit, ajo banonte në lagjen “1 Maji” të Fierit, bashkë me dy djemtë. Tri ditë më parë viktima kishte komunikuar me ish-gruan, e cila i kishte telefonuar sapo kishte marrë vesh se 48-vjeçari po bënte një ndarje me mur në njërën prej dhomave të shtëpisë.

Pas një pune intensive hetimore, policia arrestoi si të dyshuar për vrasjen Luljeta Zeqajn, 45 vjeçe dhe djalin e saj, A.Zeqaj. Sipas burimeve zyrtare të policisë, nënë e bir kanë kryer në bashkëpunim vrasjen e Ylli Zeqajt të premten më 23 korrik, pas një sherri që lidhej me pronësinë e banesës.

Autoritetet cilësojnë si shumë të rrezikshme puset joaktive të naftës

Shtabi i emergjencave në Prefekturën e Fierit merr masa për minimizimin e rënies së zjarreve gjatë stinës së verës. Vitet e fundit zjarret janë shndërruar në një fenomen shqetësues. Vetëm në 5 vitet e fundit dëmet e zjarrit kanë qenë të shumta dhe të mëdha. Një vëmendje e veçantë në këtë takim iu dha sektorit të naftës, që ka në bazë lëndën e djegies që mund të shkaktojë katastrofa njerëzore. Prej prefektit Bujar Hasa është kërkuar eliminimi i rrezikut të përfshirjes nga zjarret në puset e ndalur të fondit të naftës. Duke qenë se ato nuk janë në prodhim, nuk janë në vëmendjen e ndërmarrjes “Albpetrol” dhe për këtë arsye pranë tyre shpeshherë ka dhe shkurre apo janë të pakontrolluara. Në këtë mënyrë janë të ekspozuara nga zjarret, gjë që kërkon një vëmendje të veçantë gjatë stinës së verës. Zjarret në Fier shpeshherë kanë shkaktuar dëme serioze. Vlen të përmendet zjarri i qëllimshëm i rënë në pyllin e Semanit dhe Darëzezës, që shkatërroi dhjetëra hektarë pyje me pishë dhe bredh, pasuria e bregdetit fierak. Për të minimizuar fenomenin, Shtabi i Emergjencës i mbledhur paraditen e së hënës ka nisur punën fillimisht me “rimëkëmbjen” e shtabeve të emergjencës në të gjitha njësitë vendore me qëllim ndarjen e punës në mënyrë policentrike. “Bashkëpunimi sa më i mirë dhe gjithëpërfshirës do të sjellë një rezultat më të madh. Duhet që gjithkush ta ndiejë përgjegjësinë e punës”, ka deklaruar prefekti Bujar Hasa. Tërheqja e vëmendjes për mobilizimin e strukturave të njësive vendore ka ardhur pas neglizhencave që këta të fundit kanë shfaqur në vitet e mëparshme, duke e parë këtë detyrë më tepër si një përgjegjësi e ndërmarrjeve pyjore apo zjarrfikësve.

Fier- Drejtoria Rajonale e Mirëmbajtjes së rrugëve Fier ka ndëshkuar disa nga firmat e ndërtimit që kanë marrë akset nacionale të qarkut me sipërmarrje. Forma e ndëshkimit ka qenë bllokimi i xhirimit të fondeve për to dhe shkak është bërë mosndërhyrja e firmave në përmirësimin e situatës së rrugëve.

Janë 12 firma ndërtimi që kanë lidhur kontratë me Drejtorinë e Rrugëve dhe në bazë të kontratës duhet të përgjigjen për një infrastrukturë të vlerësueshme të akseve që kanë me sipërmarrje. Sipas drejtorit Moxar Çela, ndëshkimi është marrë nga ana e drejtorisë, që është edhe supervizori i firmave ndërtuese dhe vjen si shkak i mosrealizimit të mirëmbajtjes së rrugëve sipas kushteve të parashikuara dhe përcaktuara në kontratë. Në të njëjtën kohë, si rezultat i gjendjes së mjerueshme të rrugëve ka nisur mirëmbajtja e tyre nga vetë drejtoria. “Është intensifikuar puna në ato akse kombëtare që janë braktisur për nga mirëmbajtja prej firmave që i kanë marrë me sipërmarrje. Po ashtu puna lidhet edhe me faktin se ka nisur tashmë sezoni turistik. Janë akset turistike Fier-Vlorë dhe Fier-Seman ato që po mirëmbahen nga ne dhe puna në to do të vazhdojë me ritme të larta deri në fund të sezonit”, ka thënë drejtori Çela. Rreth 40% e vlerave mujore që janë ndërprerë për firmat është përdorur nga vetë Drejtoria e Mirëmbajtjes së rrugës nacionale për akset e braktisura.

Fondi për ndërmarrjen cilësohet i ulët krahasuar me nevojat dhe problematikën që paraqesin sot rrugët kombëtare, si ato drejt Beratit, Ballshit, Vlorës etj. “Si pasojë e dimrit të shkuar me reshje të vazhdueshme dhe një dimri të karakterizuar nga lagështira, shumë rrugë paraqesin situatë të rënduar për nga infrastruktura. Për këto rrugë të dëmtuara nuk ka ndonjë investim për momentin. Këto vazhdohen të mirëmbahen me atë fond të limituar që është përcaktuar në fillim të vitit”, ka pohuar drejtori.

Fier, shkak i virozave, helmimeve apo prekjeve nga sëmundjet infektive

Depozitat e ujit janë bërë problem për sëmundshmërinë, sidomos në Fier. Alarmi ka ardhur pas regjistrimit të disa rasteve me virozë të shkaktuara nga uji i ndotur. Në këto ditë të nxehta vere është rritur numri i personave të prekur nga virozat e stinës. Një nga faktorët, sipas autoriteteve të shëndetësisë, është edhe cilësia e ujit të pijshëm. Përballë disa rasteve të regjistruara gjatë kësaj jave, me virozë të shkaktuar si pasojë e ujit, autoritetet më të larta të shëndetit publik në Fier apelojnë për mospërdorimin e ujit të depozitave të shtëpive.

Sipas nëndrejtoreshës së Shëndetit Publik në Fier, Shpëtime Kalemi, rreziku që i kanoset popullatës nga konsumi i ujit të depozitave është tejet i lartë.

“Depozitat, edhe pse furnizohen me ujë çdo ditë, përmbajnë baktere dhe lëndë të rrezikshme. Jo gjithmonë depozitat e zbrazin të gjithë ujin që marrin. Në fund të tij tepron uji, i cili grumbullohet vetë dhe së bashku me prurjet e tjera mbledh mbeturina. Ka pasur raste që ka prurë e grumbulluar edhe ndryshk”, ka sqaruar nëndrejtoresha e Shëndetit Publik, Kalemi.

Ajo shpjegon se ka edhe nga ato raste kur në depozita ka pasur gjallesa, të cilat rriteshin me kalimin e ditëve. Sipas saj, nuk duhen përjashtuar edhe rastet e pranisë së krimbave, të cilët shtohen shpesh.

“Nuk është çudi që sidomos gjatë stinës së verës gjallesat dhe mikrobet rriten më shpejt, për shkak të ngrohtësisë, të cilat më pas për fat të keq veprojnë në trupin e njeriut. Bëjmë thirrje që tani në stinën e verës të ketë një kujdes të veçantë për depozitat. Ato duhen pastruar vazhdimisht”, ka apeluar Kalemi.

Me anën e një thirrjeje publike që autoritetet e shëndetësisë kanë bërë prej disa ditësh, njoftohet popullata që të pastrojë depozitat të paktën një herë në muaj dhe për stinën e verës të eliminojë konsumin e ujit të këtyre mjeteve depozituese. Përveç pastrimit, sipas Kalemit, popullata duhet të kryejë edhe dezinfektim të depozitave dhe të enëve të tjera ku mbajnë ujin.

Por, thirrja e autoriteteve të shëndetësisë duket se krijon vështirësi dhe probleme te banorët e pallateve të reja, për shkak se depozitat e ujit i kanë të përbashkëta. Rreziku më i madh qëndron te kjo kategori e popullatës, për të cilën duhet të ndërhyjnë kujdestarët. Rastet e regjistruara deri më tani me virozat, si shkak i ujit jocilësor, kanë qenë pikërisht nga këto blloqe pallatesh të reja.

Parcela me 201 bimë narkotike ishte nën administrimin e Komunës Kutë. Nuk gjendet dot kultivuesi

Gjendet kanabis sativa në një tokë publike, penalizohet kreu i zyrës së kadastrës, që e kishte nën juridiksion. Burime zyrtare nga policia e Mallakastrës bëjnë të ditur se pas gjetjes së 201 rrënjëve të bimës kanabis sativa në një sipërfaqe toke publike nën juridiksionin e Komunës Kutë, është vënë përballë përgjegjësisë shefi i kadastrës së kësaj komune, Musa Hoxha. Ky i fundit po ndiqet penalisht në gjendje të lirë për veprën penale “Shpërdorim detyre”. Ka qenë një kontroll rutinë, zhvilluar një ditë më parë në kodrat e fshatit Kutë të Rrethit Mallakastër, ai që ka konstatuar ekzistencën e rrënjëve të bimës narkotike. Nga burimet zyrtare të policisë së Mallakastrës mësohet se aksioni u ndërmor në kuadër të planit të masave të Drejtorisë së Policisë të Qarkut Fier në luftën kundër kultivimit të bimëve narkotike në bashkëpunim me Komunën Kutë. Nga ky kontroll i ushtruar në terrenin e këtij fshati, u gjet një parcelë e mbjellë me bimë të dyshuara si kanabis sativa. Nga veprimet e para hetimore rezultoi se në kodrën e quajtur “Lorica” të këtij fshati u gjet një parcelë e ndarë në tri pjesë në të cilën ishin mbjellë 201 bimë të cilat dyshohen se janë narkotike. Parcela e tokës është në juridiksionin e Komunës Kutë. Për këtë arsye, nga ana e strukturave policore u përgatitën materialet për fillimin e procedimit penal në gjendje të lirë për veprën penale “shpërdorim detyre” në ngarkim të shtetasit Musa Hoxha, 63 vjeç, me detyrë përgjegjës i kadastrës së Komunës Kutë. Procedimi penal për këtë shtetas filloi pasi ky punonjës nuk ka kryer verifikimin për të gjitha parcelat e tokës që ka në juridiksion Komuna Kutë, duke mos përcaktuar kështu pronësinë mbi parcelën në të cilën u konstatuan të mbjella bimët narkotike. Ndërkohë, nga ana e policisë po punohet për zbulimin e autorëve të kultivimit të sasisë së bimëve narkotike.

Aktiviteti- Bylisi i Mallakastrës pret edicionin e katërt të Festivalit të Polifonisë. Grupe nga e gjithë Shqipëria, por edhe Kosova, Maqedonia, Mali i Zi apo dhe Çamëria do të jenë të pranishëm në këtë takim tashmë tradicional. Organizatorët janë kujdesur për çdo detaj të këtij festivali, edhe për praninë e ujit dhe të dritave, duke qenë se fshati Hekal, zona e banuar më e afërt ndodhet 1.5 kilometra larg Parkut Arkeologjik të Bylisit. “Krahas Apolonisë në Fier, edhe Bylisi në Mallakastër është një perlë tjetër e Qarkut të Fierit, e cila synohet të pasurohet vazhdimisht edhe nëpërmjet aktiviteteve kulturore, aq më tepër nëpërmjet Festivalit të Polifonisë”, u shpreh kryetari i Bashkisë së Fierit, Baftjar Zeqaj. Organizatorë të këtij aktiviteti, i cili ka edhe mbështetjen e Ministrisë së Turizmit, Kulturës, Rinisë dhe Sporteve, janë Bashkia e Fierit, ajo e Ballshit, Komuna Hekal në territorin e të cilës ndodhet Parku Kombëtar Arkeologjik etj.

Dita e mjedisit- Në prag të ditës botërore të mjedisit, specialistët kanë renditur disa nga problemet mjedisore me të cilat shqiptarët po përballen prej vitesh edhe pse zgjidhja e tyre është emergjente.

Ajri i ndotur, por edhe menaxhimi i mbetjeve urbane janë dy nga problemet më shqetësuese në Shqipëri, për të cilat kërkohen më tepër investime. Në disa qytete të vendit ajri rezulton prej disa vitesh me ndotje disa herë më të lartë se normat e Bashkimit Europian. Kjo për sa i përket pluhurit të respirueshëm.

Kjo situatë e rëndë, jo vetëm në Tiranë, por edhe në Elbasan, Durrës, Shkodër, Vlorë dhe Fier, ka çuar në rritjen e numrit të personave të prekur nga alergjitë, por edhe sëmundjet polmunare.

Më 29 maj të saktësisht 18 viteve të shkuara, pra më 29 maj 1992, Fierin dhe krejt vendin e tronditi një ngjarje kriminale e përmasave të pazakonta. Një familje e tërë në fshatin Libofshë, të pesë anëtarët e saj, përfshirë një foshnjë disamuajsh, u gjetën të masakruar me sende të forta. Lajmi i transmetuar nga mediat drithëroi gjithë opinionin, duke injektuar pasiguri për jetën apo mosbesim në strukturat e shtetit, që paguheshin e përgjigjeshin për sigurinë. Impakti duket qe i së njëjtës peshë edhe për krerët e shtetit, që vinte i sapokonfiguruar pas fitores së zgjedhjeve nga Partia Demokratike më 22 mars 1992. Gjatë ditëve në vazhdim opinioni nuk mësoi pothuaj asgjë për vijimin e kësaj ngjarjeje, pasi në ato kohëra, në vazhdën e eksperiencës së komunizmit, hetimi për ngjarjet kriminale mbahej larg mediave. Kështu që lajmi i dytë i madh, që drithëroi sërish opinionin, por që edhe që i shkoi për shtat shumëkujt, ishte varja e dy autorëve të masakrës në sheshin para turizmit, në qendër të Fierit, më 25 qershor 1992, më pak se një muaj pas masakrës. Një veprim ndëshkues, që do të statistikohej i fundit në historinë moderne të Shqipërisë. Ndërsa ajo që mbeti pa u thënë, që mbeti e tillë për 18 vjet me radhë, ishte mënyra se si u zbuluan autorët e masakrës, provat që u grumbulluan kundër tyre dhe fakti nëse ata e pranuan apo jo krimin me gojën e tyre. Të gjitha këto, për herë të parë, i zbulon një dokument “sekret” i asaj kohë, që në fakt është një “përgjithësim” për ngjarjen, që u ka shkuar të gjitha degëve të Rendit Publik në rrethe. Një dokument, ku pas përshkrimit të ngjarjes, janë renditur edhe meritat e të metat e hetimit, me qëllim që materiali të lexohej nga uniformat blu në gjithë vendin për të shërbyer si përvojë në punën e tyre të mëtejme. Kështu, për herë të parë ky dokument zbardh veprimet e policisë për zbulimin e krimit, mënyrën se si u shkua te dy autorët, vëllezërit Ditbardh e Josif Çuko, punën e saktë dhe meritën e pakundërshtueshme të një eksperti kriminalistik nga Vlora si dhe zbardhjen e motivit të vrasjeve. Më poshtë përmbajtja e dokumentit që botohet për herë të parë.

Dokumenti
Sekret
Fier, më 16.06.1992
Përgjithësim
Mbi zbulimin e autorëve të grabitjes me vrasjen e pesë personave të familjes Pupa në fshatin Libofshë të rrethit Fier.
Më datën 29.05.1992, ora 06:45, në fshatin Libofshë të rrethit Fier, në banesën e tyre u gjetën të vrarë shtetasit Petrit, Zenepe, Agim, Rajmonda dhe Magdalena Pupa. Autorët e krimit kishin mundur të përkulin hekurat e dritares, hequr xhamin e superluçes dhe ishin futur në banesë. Mbasi kishin vrarë pesë personat e përmendur, kishin kontrolluar në gjithë banesën dhe kishin përvetësuar një valixhe, e cila u gjet e shqyer në periferi të fshatit.
Menjëherë u shkua në vendin e ngjarjes dhe me urdhër të Kryetarit të Degës së Rendit u krijua grupi operativ i përbërë nga shefi i policisë kriminale S. Muço, shefi i policisë shkencore, eksperti kriminalist K. Andoni, shefi i seksionit për krimet në fshat, B. Abedini, inspektorët e policisë kriminale S. Dhamo e A. Shkurta, inspektorët e TO (Teknikës Operative) P. Ngresi dhe V. Tanuçi si dhe punëtori i policisë, që kishte shërbyer më parë në këtë zonë Ll. Stase. Menjëherë u hartua plani i masave, duke ngritur dy versione. Versioni i parë: vrasjet ishin kryer për hakmarrje. Ky version u ngrit duke studiuar personalitetin e viktimave, për faktin se Agim Pupa ishte fejuar e ndarë disa herë dhe pjesëtarët e familjeve të vajzave ishin shprehur për hakmarrje. Versioni i dytë: vrasjet ishin kryer për grabitje. Për faktin se familja Pupa dihej që kishte lekë në shuma të konsiderueshme.
Për verifikimin e dy versioneve paralelisht u ndanë detyra konkrete për çdo pjesëtar të grupit operativ, u koordinua puna me Degët e Ruajtjes së Rendit Lushnjë, Elbasan dhe Drejtorinë e Rendit Publik, Tiranë, për verifikimin e personave të dyshimtë në këtë vrasje. Të gjithë pjesëtarët e grupit operativ brenda datës 29.05.1991 sollën informacion me vlerë, ku u verifikuan të gjitha linjat që të çonin në krimin e vrasjes për hakmarrje. Duke parë si më të mundshëm një denoncim… u bë ndalimi i shtetasve E.Sh. e E.V. duke bërë edhe një sërë veprimesh me T.O. (Teknikë Operative, përgjime) për sqarimin e këtij versioni. Nga studimi i kandidatëve të dënuar në dhomat e izolimit u gjet i përshtatshëm njëri prej tyre, i cili vazhdoi përpunimin në dhomat e izolimit të E.Sh, ndërsa E.V. u fut në një dhomë me një të dënuar që kishte lidhje shoqërore dhe u përgjua pandërprerë me T.O.
Krahas punës intensive në rrugë hetimore e operative, nuk u hoqën vëmendja në asnjë moment nga verifikimet e tjera. Vetëm pas katër ditësh, eksperti kriminalist i Degës së Rendit Publik, Vlorë, Llazar Plaku, dha konkluzionin kategorik se gjurmët e gjetura në vendin e ngjarjes, në xhamin e superluçes, janë lënë nga Ditbardh Çukos, nga fshati Libofshë. Menjëherë u organizua operacioni për kapjen e autorit, verifikimin e thirrjen e menjëhershme të të gjitha lidhjeve shoqërore e miqësore, daktiloskopimi i tyre dhe kontrolli i banesës së Ditbardh Çukos. Nga kryerja e këtyre veprimeve rezultoi se në banesën e tij u gjetën rroba me njolla gjaku dhe se përveç gjurmëve të tij, në xhamin e hequr kishte lënë shenjat e duarve edhe vëllai i Ditbardhit, Josif Çuko, 22 vjeç. Mbi këtë bazë u ndaluan si autorë dhe për kontradikta në thënie Ditbardh Çuko, 24 vjeç, Josif Çuko 22 vjeç, motra e tyre si dhe G.K., shok i ngushtë i Ditbardhit. Nga puna intensive e hetuesisë së rrethit, që në momentin e ndalimit, autorët Ditbardh dhe Josif Çuko pranuan se kishin kryer vrasje për motivin e grabitjes dhe hakmarrjes, pasi Agim Pupa kishte dashur motrën e tyre dhe e kishte lënë atë. Hetimi u bë i shpejtë dhe i plotë, brenda katër ditëve çështja penale iu dërgua për gjykim Gjykatës së Rrethit, e cila i dënoi dy autorët me vdekje, varje në litar.

Anët pozitive që ndikuan në zbulimin e autorëve
1-Përkushtimi në punë i gjithë grupit operativ, duke mos njohur kufij kohorë në verifikimin e thithjen e çdo informacioni.
2-Koordinimi i mirë i punës me Degët e Rendit Publik, që përmendëm më sipër nën drejtimin e drejtuesve më të mirë të Ministrisë së Rendit Publik.
3-Puna e lavdërueshme e shërbimit kriminalistik dhe veçanërisht e ekspertit kriminalist të Degës së Rendit Publik, Vlorë, Llazar Plaku.
4-Bashkërendimi i punës me hetuesin e rrethit, SHIK-un, në kryerjen e të gjitha veprimeve operative apo hetimore.
5-Kryerja e më se 18 kombinacioneve me T.O. dhe 6 për marrjen e shenjave të duarve, kryer me fantazi e intuitë operative nga inspektorët e policisë kriminale, bëri të mundur përjashtimin e një sërë personash të dyshuar dhe ngushtimin e rrethit të personave si autorë të mundshëm të krimit.
6-Ndërtimi me kujdes i operacionit për kapjen e autorëve si dhe bllokimi i menjëhershëm i të gjitha lidhjeve shoqërore të tyre në postën e policisë Libofshë, duke koordinuar punën me hetuesin dhe nëpërmjet veprimeve me T.O. u sqaruan pozitat e tyre.

Disa mangësi në ndjekjen e shpejtë të autorëve
Fillimisht u vërejt çoroditje për zbulimin e këtij krimi të pashembullt. Mbas kryerjes së krimit, detyrat qenë të njëanshme. Hetuesi i çështjes u mjaftua me këqyrjen e pyetjen e dy dëshmitarëve dhe u largua jashtë rrethit pa adresë. Po kështu u larguan edhe ekspertët kriminalistë dhe mjekoligjorë pa dhënë detyra orientuese e pa marrë përsipër detyra për zbulimin e krimit. U desh ndërhyrja e udhëheqjes së Degës së Rendit Publik dhe e Zv/kryetarit të hetuesisë së rrethit për riparimin e menjëhershëm të këtij defekti, çështja penale iu transferua një hetuesi tjetër, u dërgua në vend përsëri eksperti kriminalistik për marrjen e shenjave të duarve me kombinacion personave të dyshuar.
2-Eksperti kriminalist K. Andoni dha konkluzion të gabuar, duke përjashtuar të gjithë kontingjentet e daktiloskopuar të fshatit Libofshë e fshatrave përreth. Kjo bëri që informacionet e marra nga sektori operativ, që Ditbardh Çuko i dënuar më parë për vjedhje, është parë në afërsi të banesës së viktimave para se të ndodhë krimi dhe se mbas kryerjes së krimit është paraqitur mjaft i shqetësuar, aq sa dridhej, të mos çoheshin deri në fund që një ditë mbas kryerjes së krimit. U desh thirrja e ekspertit kriminalist të Degës së Rendit Publik Vlorë për shikimin edhe njëherë të shenjave të duarve të kontingjenteve vjedhës të fshatit Libofshë.
3-Verifikimet, ndonëse nuk munguan, duheshin bërë më të kujdesshme dhe më me përgjegjësi. Themi kështu se, ndonëse për çdo moment u shtrua detyrë verifikimi i personave të larguar nga Libofsha mbas kryerjes së krimit, kjo nuk u bë ashtu siç duhet. Kështu, u nxorën vetëm katër persona, të cilët njiheshin me personalitet të mirë, që janë larguar mbas kryerjes së krimit dhe nuk u nxor vëllai i të dyshuarit, Josif Çuko, që është larguar për në Greqi dhe meqenëse është kapur, ishte kthyer përsëri.
4-Ndonëse u bënë përpjekje për aktivizimin e forcës zbuluese të përjashtuar nga sektori operativ i policisë dhe tërheqja e kandidatëve të përshtatshëm për zbulimin e krimit, kjo detyrë nuk u çua deri në fund, duke përjashtuar vetëm 7-8 takime operative u anua zbulimi (?) vetëm me anën e vijës masave.
5-Koordinimi i punës me SHIK-un u la vetëm për ditën e katërt, kur duhej bërë që në momentin e konstatimit të krimit.
6-Mbajtja në kontroll e kontingjentit keqbërës duhet të ishte parë më mirë si nga sektori operativ i krimeve të hapura, ashtu edhe nga punëtori i policisë së zonës.
7-Dega e Rendit Publik Fier nuk kishte qen gjurmimi, u desh të merrej qeni i gjurmimit të Degës Rendit Publik Lushnjë dhe të pritej në vendin e ngjarjes deri sa ai të vihej në gjurmë. Nga thëniet e autorëve rezultoi se qeni e ndoqi mirë gjurmën e autorëve deri sa ata ishin futur në rezervuarin me ujë në periferi të fshatit.
Për zbulimin e shpejtë të këtij krimi, Ministria e Rendit Publik shpërbleu pjesëtarët e grupit operativ dhe personat e tjerë që ndikuan në zbulim me shumën 35 000 lekë.
Kryetari i Degës së Rendit Publik
Major M. Zaloshnja (firma, vula)

Fjalët e fundit të autorëve para varjes

Në mes të natës, në mes të qytetit të Fierit, para se të ngjiteshin në karriget dhe të shkonin qafën në litar, dy autorët e masakrës së Libofshës, vëllezërit Ditbardh dhe Josif Çuko, kanë pasur mundësinë e fjalës së fundit, apo dëshirës së fundit.Fiks si në ekzekutimet e kohës së komunizmit. Madje edhe procedura deri te procesverbali i mbajtur me këtë rast nuk dallon nga ata të pushkatimeve të bëra në kohën e komunizmit. Ndryshimi i vetëm është varrosja e kufomave në varrezat publike të Fierit.
Dënimi me vdekje me litar i dy autorëve të masakrës së Libofshës u bë sipas një gjykimi të përshpejtuar dhe vendimi i gjykatës mban datën 11 qershor, pra më pak se dy javë pas ngjarjes. Ndërsa pak ditë më pas, më 23 qershor, Presidenti i Republikës nuk u fali jetën dy të dënuarve, duke i lënë rrugë ekzekutimit me vdekje me litar.
Ja përmbajtja e këtij procesverbali.

Procesverbal
Mbi ekzekutimin e vendimit me vdekje me litar të dënuarve Ditbardh Çuko e Josif Çuko.
I mbajtur sot më datën 25.06.1992 në orën 02:00, në sheshin e turizmit në qendër të qytetit Fier, në prani të skuadrës ekzekutimit, të prokurorit të rrethit K.N., mjekut ligjor B.S., dhe shefit të policisë së rrethit A.L.
Me vendimin e Presidentit të Republikës N.36 datë 23.6.1992 dhe vendimin e Gjykatës nr. 65 datë 11.6.1992 të dënuarit Ditbardh Çuko dhe Josif Çuko janë dënuar me vdekje, varje në litar.
Në këto rrethana në zbatim të normave të rregullores Nr. 01-46 datë 30.3.198… kapitulli 11, të dënuarit Ditbardh Çuko e Josif Çuko u çuan për ekzekutim.
Para se të ekzekutoheshin, nga ana e prokurorit të rrethit iu tha se Presidenti i Shqipërisë nuk e mori parasysh kërkesën për faljen e jetës dhe me vendimin nr. 36 datë 23.6.1992 lë në fuqi vendimin e Gjykatës Popullore. Ata para ekzekutimit të vendimit deklaruan:
I dënuari Ditbardh Çuko: “Nuk kam gjë për të thënë”.
I dënuari Josif Çuko: “Nuk kam gjë për të thënë”. Pas kësaj u bë menjëherë ekzekutimi i tyre. Të varurit në litar u kontrolluan nga ana e mjekut ligjor në prezencë të pjesëmarrësve të përmendur në procesverbal, i cili konfirmon vdekjen e të dënuarve në fjalë.
Procesverbali, pasi u shkrua, u lexua nga pjesëmarrësit dhe nënshkruhet rregullisht me firmën e tyre.
Prokurori i Rrethit, K.N. (firma)
Shefi i Policisë së Rrethit A.L. (firma)
Mjeku Ligjor A.s. (firma)
Poshtë, vula e Degës së Rendit Publik, Fier

Starton sot provimi i parë me detyrim i Maturës Shtetërore 2010, ai i Letërsisë dhe i Gjuhës Shqipe. Gjatë mbrëmjes së djeshme ka nisur dhe shpërndarja e testeve nëpër sshkollat e mesme nëpër qytete, ndërsa gjatë mëngjesit të sotëm, rreth orës 06:00 ka nisur shpërndarja e tyre nëpër shkollat e mesme të Tiranës.

Provimi i parë me detyrimin, ku do të marrin pjesë 37.500 maturantë, pritet të nisë në orën 10:00 dhe do të përfundojë në orën 12:30, ku do të mblidhen dhe do të shpërndahen në katër qendrat e korrigjimit të Tiranës, Fierit, Elbasanit dhe Shkodrës.
Skema e vlerësimit është një standard vlerësues i njëjtë për çdo maturant. Vlerësimi i çdo përgjigjeje të dhënë nga maturanti për kërkesën përkatëse, mbështetet në skemën e vlerësimit të përgatitur nga hartuesit e testeve. Vlerësimi i përgjigjeve të maturantëve/kandidatëve në provimet e detyruara dhe me zgjedhje bëhet me pikë, të cilat ekuivalentohen në notë. Pas përfundimit të çdo provimi të maturës, AVA shpall skemën e vlerësimit të testit. Testet e provimit të maturës vlerësohen nga vlerësues të jashtëm.