Fieri nuk ka akoma një sistem të qartë stacionesh për shërbimin urban dhe atë taksi brenda qytetit. Ndërsa prej vitesh janë piketuar vendet e stacionimit të automjeteve taksi 4+1 me targa të verdha nuk është bërë një rivendosje e tyre. Drejtuesit e mjeteve të shërbimit taksi në Fier ankohen se përballen me zaptimin e vendeve të tyre të qëndrimit. Ata thonë se në vendin që është piketuar për qëndrimin e taksive lehtësisht parkohen edhe mjete me targa të bardha. Ndërkohë që furgonët e linjave nga qyteti në fshatrat pranë Fierit janë në një kaos të vërtetë.(Shqip)

Një ngjarje e rëndë ka ndodhur rreth orës 12 e 30 të paradites së të hënës në fshatin Kreshpan të komunës Cakran të rrethit Fier. Një 22-vjeçar banor i këtij fshati i ka dhënë fund jetës duke u vetëvrarë me një plumb në kokë.Por ajo që të trondit më shumë është fakti se djali i dyshuar si i vetëvrarë është djali i Faik Myrtaj, i cili humbi jetën në protestën e 21 janarit organizuar nga opozita.

Gjithsesi Bardhosh Myrtaj, sipas të afërmve të ardhur në spital mendohet se kohët e fundit ai ka qënë shumë i mërzitur dhe i vetmuar nga pjestarët e tjerë të familjes gjë të cilëen e reflektonte dhe në shtimin e dozës së duhanit që pinte. Ndërkohë po nga të afërm të tij ditën që ndodhi ngjarja ai kishte telefonuar dajën e tij për të marë.motorçikletën duke i treguar edhe vëndëdodhjen.

Daja pasi vjen në vëndin ku i tha nipi e gjen atë të shtrirë në tokë të plagosur në kokë dhe me një pellg gjaku që i kishte mbuluar fytyrën. Menjëherë ai ka njoftuar policinë e cila mbërriti në vendngjarje. Megjithëse ai ështe dërguar menjëherë në spital, ku nuk ka mundur t’i shpëtojë plagës së marë nga plumbi në kokë. Më pas ai është çuar në morgun e spitalit të Fierit në pritje për t’i bëtrë autopsinë

Në reagimin e saj zyrtar gjatë hetimeve u konstatua se shtetasi Bardhosh Myrtaj, 22 vjeç, banues në fshatin Kreshpan, komuna Cakran të rrethit Fier, është vetëvrarë me armë zjarri pistoletë në vëndin e quajtur “Antenat” në fshatin Kreshpan.

Sipas policisë vazhdon puna intesivisht për zbardhjen e shkaqeve, rrethanave si dhe dokumentimin e plotë ligjor të kesaj ngjarje.(Shekulli)

Vret të atin vetëm pak ditë pas daljes nga spitali. Policia arrestoi dje 45-vjeçarin Aleko Rrapi, i cili akuzohet për vrasjen e babait të tij 84-vjeçar, Koli Rrapi. Ngjarja mësohet se ndodhi mbrëmjen e së hënës, por trupi u gjet mëngjesin e së martës nga një e afërme e familjes. Burimet nga policia thanë se nuk dihet cila ka qenë biseda e fundit babë e bir, por djali kishte vetëm rreth një javë që kishte dalë nga spitali psikiatrik i Vlorës, ku kurohej prej disa vitesh.
84-vjeçari u vra në mënyrë çnjerëzore nga i biri me probleme psikike. Familja jetonte në lagjen “Mbrostar Ferko” të Fierit. Sipas burimeve nga policia, Koli Rrapi u qëllua me mjete të forta nga i biri. Banorët të cilët kanë dëgjuar britma në familjen e të moshuarit kanë menduar se ka qenë normale, pasi, sipas tyre, djali 45-vjeçar ushtronte shpesh dhunë mbi të atin.
Nga hetimet e para rezulton se Aleko Rrapi ishte larguar kohë më parë nga Shqipëri bashkë me të vëllezërit, të cilët jetonin në Amerikë. Vëllezërve u eci fati, ndërsa Aleko përfundoi në burg. Pas kryerjes së dënimit ai u kthye në Shqipëri gati pesë vjet më parë, pranë familjes së vet. Që atëherë mësohet të ketë shfaqur probleme mendore. Herë pas here 45-vjeçari kurohej në spitalin e Vlorës dhe më pas kthehej në shtëpi.
Banorë të lagjes ku banonte familja Rrapi thonë se djali e keqtrajtonte të atin jo rrallë pasi kthehej nga spitali. Madje, sipas tyre, edhe policia ka qenë e pranishme në disa raste, por dhuna ndaj të moshuarit nuk është ndalur. Madje, edhe vetë banorët i druheshin 45-vjeçarit.
Pak ditë më parë, Aleko ishte sërish në spitalin e Vlorës. Ai doli vetëm 4-5 ditë më parë, ndërkohë që të hënën në darkë, banorët ridëgjuan britmat nga shtëpia. Mëngjesin e së martës, një e afërme, e cila i shërbente të moshuarit pas vdekjes së bashkëshortes, e gjeti të vdekur 84-vjeçarin. Policia arrestoi djalin 45-vjeçar.
E pyetur lidhur me ngjarjen, drejtoresha e spitalit psikiatrik të Vlorës, nuk pranoi të japë asnjë deklarim, ndërsa u shpreh se për 45-vjeçarin duhet të shprehet mjeku i familjes, si dhe Drejtoria e Shëndetit Publik.
Brenda një jave është hera e dytë që të sëmurët mendorë shkaktojnë vdekjen e personave. Më datën 28 mars një 26-vjeçar vrau me mjete të forta një 9-vjeçar i cili po luante në oborrin e një fqinji me një tjetër fëmijë.(Shekulli)

Ngjarjet rrugore, gjatë orëve të para të ditës së djeshme në Fier dhe Peqin

E diel e përgjakur në akset nacionale të vendit. 11 të plagosur ka qenë bilanci i 2 aksidenteve të ndodhura dje, gjatë orëve të parë të ditës, në autostradën Fier-Vlorë dhe Elbasan-Peqin. Ngjarja e parë rrugore ka ndodhur rreth orës 05:00 të së dielës, kur në aksin rrugor Fier–Vlorë, në vendin e quajtur Ferras, dy automjete janë përplasur me pasojë plagosjen e gjashtë personave. Burime nga vendi i ngjarjes bëjnë të ditur se automjeti tip “Benz” me targa FR 50-51B, që drejtohej nga 51-vjeçari Ilir.M., është përplasur me një automjet tjetër po tip “Benz” me targa VL 23-92 A, që po lëvizte në drejtim të Vlorës. Në automjetin me targa të Fierit ndodheshin vetëm drejtuesi me bashkëshorten, L.M., 45 vjeçe, ndërsa në mjetin e Vlorës ndodheshin katër persona, mes tyre një çift të moshuarish. Mjetet janë përplasur duke shkaktuar plagosjen rëndë të të dyja çifteve të bashkëshortëve nga Fieri dhe Vlora. Për pasojë fierakët L.M, 45 vjeçe, dhe Ilir. M, 51 vjeç, si dhe çifti i të moshuarve nga Vlora me inicialet M.N dhe T.N, përkatësisht 65 dhe 70 vjeç, janë çuar me urgjencë në spitalin e Fierit, ku i janë nënshtruar ndërhyrjes mjekësore. Gjendja e tyre shëndetësore vazhdon të jetë e rëndë, si pasojë e plagëve të shumta, që kanë marrë në momentin e përplasjes, ndërkohë që dy personat e tjerë pasagjerë në mjetin me targa të Vlorës, fatmirësisht kanë marrë vetëm disa plagë të lehta. Sipas policisë rrugore, aksidenti është shkaktuar si rezultat i shkeljes së rregullave të qarkullimit rrugor, duke tejkaluar shpejtësinë e lejuar, por ende nuk ka një konstatim zyrtar për përcaktimin e shkakut të aksidentit. Ekspertët e policisë rrugore po punojnë për dokumentin e plotë të ngjarjes dhe vënien përpara përgjegjësisë të shkaktarit. Ndërkohë një tjetër aksident i rëndë me pasojë plagosjen e pesë personave, ka ndodhur dje në mesditë në aksin rrugor Elbasan–Peqin, në vendin e quajtur “Unaza e Peqinit”. Burime të Komisariatit të Policisë Peqin bëjnë të ditur se një automjet tip “Skoda” me targa të huaja BA 404 TA, është përplasur me një mjet tip “Benz” me targë CD 289RB. Si pasojë e aksidentit janë dëmtuar: Erlin Xhafa, 16 vjeç, Hekuran Shkëmbi, 32 vjeç, Redion Xhafa, 14 vjeç, Eva Xhafa, 18 vjeç dhe Andi Xhafa, 22 vjeç. Menjëherë pas përplasjes, të dëmtuarit janë dërguar me urgjencë për në spitalin kirurgjikal të Elbasanit, ku ndodhen nën kujdesin e mjekëve. Sipas policisë lokale mësohet se shkak i aksidentit është bërë lëvizja e gabuar e drejtuesit të mjetit tip “Benz”, i cili ka lëvizur në kah të kundërt të rrugës. Ndërsa policia vazhdon hetimet për dokumentin e plotë të ngjarjes rrugore, burimet spitalore konfirmojnë se të plagosurit janë jashtë rrezikut për jetën.

Rritet numri i bizneseve fierake që deklarojnë falimentin, ndërkohë që biznesmenët e rinj po tregohen tepër “të kujdesshëm”. Haxhi Krasniqi, kreu i QKR-së Fier, është shprehur se kostoja e lartë e jetesës së qytetarëve dhe tregu, kanë qenë ndikuesit kryesorë të natyrës së përzgjedhur nga biznesmenët e rinj. “Qytetarët kanë treguar se po gjejnë rrugë alternative për të siguruar të ardhura dhe punë. Kjo duket te bizneset e çelura gjatë katërmujorit të parë të vitit 2010. Të paktën të dhënat që ka QKR-ja tregojnë se janë çelur më shumë biznese sesa janë mbyllur. Kjo deklaratë mund të bjerë ndesh me shifrat që ka dega rajonale tatimore, si dhe drejtoria e tatimeve në bashki. Por, duke u bazuar tek ata që i janë drejtuar QKR-së, shprehem se kriza ekonomike ka reflektuar më shumë në natyrën e bizneseve të reja”, ka thënë Krasniqi, duke shtuar se bizneset e reja kanë qenë kryesisht pika tregtimi produktesh ushqimore si dhe bar-kafe.

Ndërkohë kalimi i mjaft bizneseve nga të vegjël në të mëdhenj ka bërë që të shtohet së tepërmi numri i atyre subjekteve që deklarojnë falimentin e që kërkojnë mbylljen e aktivitetit.

Inspektorati: Gjatë këtij viti janë evidentuar 34 raste dhe janë penalizuar fermerët

Inspektorati i Mbrojtjes së Tokës në Këshillin e Qarkut të Fierit llogarit një bilanc në shifra të larta të dëmtimit të tokës bujqësore. Përveç fenomeneve natyrore, dora e njeriut ka qenë shkaktari kryesor i rasteve të shumta të dëmtimit të tokës. Sipas të dhënave që jep kryetari i Inspektoratit të Tokës Bujqësore, Pëllumb Saliaj, mësohet se për gjashtëmujorin e parë të këtij viti janë evidentuar 34 raste të dëmtimit të tokës bujqësore nga vetë fermerët.

Evidentimi i tokës së dëmtuar është bërë pas kontrolleve që agjentët e inspektoratit të sipërcituar kanë kryer. Në rastet e dëmtimit, inspektorati ka prerë edhe gjoba, si dhe ka vendosur masa të tjera ndëshkimore. Në disa raste, fermerët janë detyruar të kthejnë në gjendjen e mëparshme tokën e dëmtuar. Por, pranohet fakti se edhe pse autoritetet kanë marrë këto masa ndëshkimore, toka bujqësore nuk është kthyer në gjendjen e saj të mëparshme. Në të tilla raste, inspektorati ka shkuar deri edhe në kallëzim penal për dëmtuesin e tokës.

Sipas kreut të Inspektoratit të Tokës Bujqësore në Fier, është paditur një firmë ndërtimi, e cila ka rezultuar pas kontrolleve të kryera se ka dëmtuar tokë bujqësore në rrugën e fshatit Cakran.
“Dëmtime të tokës bujqësore janë konstatuar në mjaft zona të tre rretheve të Qarkut Fier. Kështu janë konstatuar dëmtime në Komunën Qendër, Mbrostar, Cakran, Frakull të Rrethit të Fierit, si dhe në komunat Bubullimë, Kolonjë e Tërbuf të Rrethit Lushnjë. Gjithashtu janë konstatuar dëmtime edhe në rrugën Fier-Ballsh, si dhe në dy komuna të Mallakastrës. Për të 34 rastet e konstatuara janë mbajtur procesverbale”, ka thënë kreu i Inspektoratit të Tokës, Pëllumb Saliaj. Ai ka thënë se sipërfaqet e dëmtuara janë të mëdha. Ka raste të veçanta kur dëmtimi shkon deri dhe në 3 hektarë. Në total toka e dëmtuar shkon në dhjetëra hektarë.

Dimri i sivjetshëm, tepër i lagësht, është cilësuar si një faktor më shumë për dëmtimin e tokës bujqësore. Gjatë periudhës së parë të vitit, reshjet e shiut bënë që sipërfaqe të tëra toke të rrëshqisnin. Më tepër se 900 hektarë tokë bujqësore u prekën nga dëmtimi si pasojë e kushteve natyrore, kryesisht rrëshqitjeve.

Edhe në mbledhjen e pak ditëve më parë, Këshilli i Qarkut u bëri apel komunave veçanërisht për të ndërhyrë, me qëllim frenimin e fenomenit të dëmtimit të tokës. Asnjë nga komunat nuk ka raportuar dhe nuk ka mbajtur procesverbale për rastet e evidentuara të dëmtimit.

FIER- Sot në orën 05:00 të mëngjesit një 20-vjecar është gjetur i mbytur në plazhin e Ndërnenazit në Fier. Viktima mësohet të jetë Aurel Metushi, i cili ishte kthyer nga Greqia katër ditë më parë për të kaluar pushimet.

I riu nga fshati Libofshë e Fierit kishte qënë bashkë me shokët në plazh kur ka hyrë në det për të mos dalë më i gjallë. Në bazë të dëshmive nga shokët e tij, sipas policisë mësohet se 20-vjecari nuk kishte qenë në gjendje të mirë shëndetësore para se të futej në det, cka mendohet se mund të jetë bërë shkak për mbytjen e tij.Trupi i pajetë i të riut, u gjet pas kërkimeve të policisë e familjarëve, pasi ishte zhdukur prej 24 orësh.

Pritet që pas ekspertizës mjekoligjore të zbulohet edhe shkaku i vdekjes së të riut 20-vjecar.

Kreu i bashkisë: “Kemi bërë ndryshimet e sugjeruara, presim KKRRTSH”

Qendra e qytetit të Fierit mund të cilësohet ende një zonë e ndaluar për ambiciet e ndërtuesve të shumtë, si dhe të investimeve që ata duan të realizojnë. Ka afro tre muaj që plani rregullues i qendrës së qytetit të Fierit është miratuar nga Këshilli i Rregullimit të Bashkisë. Ky i fundit ka miratuar edhe variantet e zhvillimit urbanistik, por prej tre muajsh miratimin e qendrës së qytetit të Fierit e mban peng KKRRTSH-në. “Ne kemi reflektuar të gjitha vërejtjet dhe sugjerimet që na janë bërë. Pas këtyre ndryshimeve kemi dërguar dosjen në sekretarinë teknike të KKRRTSH-së. Ka disa ditë që dosja i është dërguar autoritetit përkatës, por ende nuk kemi asnjë sinjal”, ka thënë kryetari i bashkisë Fier, Baftjar Zeqaj. Më tej kryebashkiaku është përqendruar te ndryshimi i ligjit për urbanistikën. “Në përgjithësi, ligji për urbanistikën ka ndryshime. Është duke u diskutuar akoma nëse qendra duhet të futet në KKRRTSH apo do të miratohet nga këshilli teknik apo nga një njësi tjetër që është parashikuar në ligjin e ri. Ky moment shpresojmë të përcaktohet shumë shpejt e për rrjedhojë, shpresojmë që shumë shpejt të kemi të miratuar edhe qendrën e qytetit”, ka vijuar më tek kryetari i bashkisë, Baftjar Zeqaj.

KRRT e bashkisë miratoi në fundjavë 40 sheshe dhe leje, kryesisht për pallate

Pas disa muajsh pasigurie në sektorin e ndërtimit për qytetin e Fierit ka nisur më në fund të ndihet optimizmi. Kjo është parë në dy mbledhjet e fundit të strukturës së Këshillit të Rregullimit të Territorit për bashkinë. Në mbledhjen e muajit të kaluar KRRT-ja ka miratuar mbi 20 leje ndërtimi, kryesisht për pallate të reja shumëkatëshe, apo dhe objekte të ndryshme banimi dhe tregtimi. Ndërsa në mbledhjen e radhës, e cila është zhvilluar një ditë më parë, KRRT-ja ka miratuar plot 40 leje dhe sheshe ndërtimi.

Për një qytet si Fieri, numri i lejeve të ndërtimit që kalojnë për miratim në KRRT është i pritshëm dhe i justifikueshëm. Gjatë mbledhjes së radhës, kryetari i bashkisë, Baftjar Zeqaj, që është njëherazi edhe kryetari i KRRT-së ka tërhequr vëmendjen në rishikimin e strukturës së disa objekteve. “Rishikimi i strukturës së disa objekteve, – sipas kryebashkiakut Zeqaj, – duhet të bëhet në raport me hapësirën që ato zënë, si dhe me vendosjen e tyre”.

Më e detajuar kjo kërkesë e kryetarit të bashkisë, Baftjar Zeqaj, zbërthehet me faktin se objektet e reja para miratimit të sheshit, si dhe dhënies së lejes së ndërtimit duhet të studiohen që ku ndodhen dhe si është projekti i ri në lidhje me sipërfaqen dhe ndërtimet përreth.

“Duhet të sugjerohen ndryshime për disa nga lejet e ndërtimit, pasi studimet e zonave ku ato do të ndërtohen nuk janë më të atyre shtatë viteve më parë, ndaj këtu duhet të kemi kujdes. Kam një vërejtje tjetër lidhur me shfrytëzimin barbar të asaj sipërfaqeje që quhet sipërfaqja pronë. Dua që të ketë një shkëputje mes pallateve shumëkatëshe dhe objekteve të tjera. Sipërfaqja e këtyre të fundit, patjetër që duhet të jetë më e vogël. Gjithashtu duhet të respektohen edhe kriteret e urbanistikës”, ka sqaruar kryetari i bashkisë.

Gjatë vitit 2010, pjesa më e madhe e shesheve dhe lejeve të ndërtimit që kanë kaluar pragun e KRRT-së së bashkisë kanë qenë objekte banimi, si dhe biznese dhe aktivitete të ndryshme. Në Fier është rikthyer edhe fluksi i ndërtimeve “luksoze” dhe shumëkatëshe. Ndërtimi i tyre u ndërpre për disa muaj jo vetëm për faktin e mosfunksionimit të KRRT-së katër anëtarë të të cilës u shkarkuan nga prefekti, por edhe si pasojë e krizës financiare.

Fier- Vetëm në dy ditë veprimtari të strukturës së re janë bllokuar 25 mjete për mungesë të theksuar dokumentacioni dhe për të tjera shkelje ligjore

Struktura e re e Policisë Rrugore në Fier ka nisur punën në pika kyçe të rrugëve të qytetit, si kryqëzimi i Vlorës dhe ai Sheqit të Madh në drejtim të Tiranës. Vetëm në dy ditë veprimtari të strukturës së re janë bllokuar 25 mjete për mungesë të theksuar dokumentacioni dhe për të tjera shkelje ligjore.

Policia e Qarkullimit Rrugor jo vetëm në Fier, por në të gjithë vendin tashmë është një strukturë më vete e pavarur, por bashkëpunimi me strukturat e tjera të Policisë së Shtetit do të jetë i ngushtë. Kështu në Qarkun e Fierit, shefi i Komisariatit të Qarkullimit Rrugor, emëruar pak ditë më parë, Artan Osmani, së bashku me efektivët e kësaj policie ka ushtruar kontrolle në pika kyçe ku qarkullimi rrugor është më i theksuar si në kryqëzimin e Vlorës apo në atë të Sheqit të Madh në drejtim të Tiranës, të cilat janë nyje kryesore të lëvizjeve të mjeteve si në jug ashtu dhe në veri të vendit.
Qysh prej dy ditësh, qindra mjete janë kontrolluar nga kjo polici për sa i përket dokumenteve apo gjendjen teknike të tyre gjatë qarkullimit në rrugë. Vetëm për dy ditë, në këtë drejtim janë bllokuar 25 automjete me targa të huaja, të cilat nuk kishin dokumentacionin e duhur. Sipas drejtuesit të Komisariatit të Qarkullimit Rrugor në Qarkun e Fierit, Artan Osmani, qëllimi i këtyre kontrolleve është zbatimi i rregullave të qarkullimit nga drejtuesit e mjeteve për të shmangur aksidentet në rrugë, pasi në Fier ato janë të shpeshta.

Sipas Osmanit, ky është një kontroll i përbashkët edhe me patrullat e përgjithshme të Policisë së Shtetit në kuadrin edhe të një plani masash për sezonin turistik, i ardhur nga Drejtoria e Përgjithshme e Policisë.

“Ky aksion, vijon shefi i ri i qarkullimit, ka filluar prej dy ditësh dhe po insiston më shumë në monitorimin e rreptë të superstradave nëpërmjet radarëve që janë vendosur aty për uljen e shpejtësisë, që është dhe shkaku kryesor i burimeve të aksidenteve. Janë bllokuar 25 mjete për mungesë të theksuar dokumentacioni siç janë ato me targa të huaja, që u ka kaluar afati i qëndrimit në Shqipëri e të tjera. Ky aksion, i cili do të vijojë edhe në ditët e ardhshme, do të garantojë sigurinë rrugore në çdo aks të tij, sidomos tani që ka edhe fluks të mjeteve të ardhura nga jashtë apo edhe ato brenda që do të qarkullojnë për turizëm në vendet e bukura që ka Shqipëria”.

Është pikërisht Fieri që do të presë këtë lëvizje, pasi ka rrugë transite për të shkuar në jug ose veri të Shqipërisë.