Një fontanë gazi shpërtheu gjatë një eksperimenti në zonën e Hekalit. Një shpërthim gazi nga një pus nafte në fshatin Hekal të Mallakastrës ka vënë në rrezik jetët e disa punëtorëve dhe banorëve të zonës. Shpërthimi i gazit ka ndodhur rreth orës 17:50 të ditës së djeshme dhe për pasojë dhjetë persona, kryesisht fëmijë, janë helmuar dhe kanë marrë ndihmën në spitalin e qytetit të Ballshit. Lajmi konfirmohet për gazetën nga përfaqësues të firmës “Stream Oil” që ka nën administrim pusin ku ndodhi shpërthimi i gazit që në gjuhën teknike quhet fontanë, si dhe nga autoritetet vendore në Hekal dhe Ballsh. Petrit Sulkaj, specialist i firmës “Stream Oil” sqaroi se në pusin e fondit të ndalur në zonën e Hekalit është bërë një eksperiment nga kjo kompani, për të vënë në punë shtresat gëlqerore dhe ranore të pusit. Si pasojë e një valvule të amortizuar të vendosur që nga koha kur pusi ishte nën administrimin e kompanisë “Albpetrol”, ka ndodhur një shpërthim gazi. Sulkaj thotë se ka qenë valvola e amortizuar shkak i fontanimit dhe gazi është përhapur në atmosferë, në një zonë të gjerë. Menjëherë drejt fshatit Hekal janë nisur dy ambulanca nga Ballshi dhe dy nga Fieri për të ndihmuar banorët, dhjetë prej të cilëve janë dërguar në spitalin e Ballshit ku kanë marrë ndihmën e parë. Dëshmitarët në vendngjarje thanë se të paktën gjysma e personave të helmuar nga gazi i shpërndarë në atmosferë ishin fëmijë, të cilët u grumbulluan pranë pusit nga kurioziteti, të tërhequr nga fishkëllima e fortë që lëshonte shkarkimi i gazit. Në vendngjarje kanë shkuar menjëherë edhe disa mjete zjarrfikëse, por deri në mbrëmje vonë ndihma e tyre nuk ka qenë e nevojshme. Specialistë të “Albpetrolit” kanë shkuar dje në Hekal dhe në bashkëpunim me specialistët e firmës “Stream Oil” kanë nisur punën për riparimin e avarisë.

Fillimi i vitit 2009 dhe ulja e temperaturave nën zero kanë sjellë edhe rritjen e ndjeshme të çmimit të gazit në Rrethin Fier. Rritja me 10% e çmimit ka sjellë për të gjithë konsumatorët e tij një dobësim të ekonomisë familjare, pasi produkti përdoret rëndom, sidomos në stinën e dimrit, për gatim dhe ngrohje. Kështu, nëse më parë një litër gaz shkonte nga 140 lekë deri në 150 lekë, sot ai ka shkuar në 160 lekë për litër. Banorë të ndryshëm të Fierit, që përdorin gaz si për ngrohje dhe gatim, shprehen se çmimi i gazit vjen gjithnjë në rritje, duke ndikuar së tepërmi në xhepat e tyre. “Ditë për ditë sheh çmim të rritur të gazit. Thua sikur prodhuesit e tij të jenë të ndikuar nga temperaturat dhe jo nga veçantitë e biznesit”, ka thënë Hurma Levanaj, banore e Fierit. Në fillim të muajit tetor të vitit 2008, çmimi i një litër gazi ishte rreth 80 lekë për litër. Për pak javë ai shkoi në 120-130 lekë për litër.