Komisioni i Emergjencave Civile dorëzon në prefekturë raportin për sigurinë. Fieri konsiderohet ende një zonë e rrezikuar nga municionet dhe lëndët helmuese. Kjo deklaratë alarmante ka ardhur nga Komisioni i Emergjencave Civile në Prefekturën e Fierit, përgjegjësi i së cilës deklaron për gazetën “Shqip”, se Fieri është i rrezikuar nga 20 tonë municione që ndodhen ende të depozituara në repartin ushtarak të Grizës, në afërsi të Patosit, si dhe nga një sasi e madhe lëndësh kimike që ndodhen në ish-uzinën e Azotikut, në periferi të Fierit.

Një material të detajuar për rreziqet që i kanosen Fierit, Komisioni i Emergjencave Civile ia ka përcjellë prefektit Shahin Bejdaj. Ky i fundit pohon se për këtë rrezik ka vënë në dijeni instancat më të larat shtetërore, qeverinë dhe Parlamentin.

“Në depot e municionit në fshatin Grizë, nga 2300 tonë municione janë larguar 90 për qind e sasisë dhe kanë mbetur 20 tonë, që janë municione të mbledhura pas vitit 1997 dhe që pritet të largohen, ose asgjësohen së afërmi. Duhet thënë se ka një sasi të madhe municionesh që paraqesin rrezik gjatë transportit, ndaj është parë e arsyeshme që ato të asgjësohen në vend. Ky aksion do të realizohet nga specialistë të fushës së demontimit, si dhe nën masa të rrepta sigurie teknike”, tha prefekti i Fierit, Shahin Bejdaj.

Por, një pikë tjetër e rrezikshme për popullatën, sipas prefektit Bejdaj, konsiderohet edhe Ndërmarrja e Azotikut, ku janë të depozituara ende lëndë kimike të rrezikshme.

“Megjithëse jemi përqendruar në evidentimin e dy pikave me rrezikshmëri për popullatën, si në grupin e depove të municioneve në Grizë dhe Azotik, në këtë të fundit duhet thënë se ka akoma kimikate të rrezikshme. Në Azotik është punuar për zbatimin e projektit të qeverisë shqiptare, për groposjen e arsenikut, projekt që ka kapur vlerën e 1.5 milionë eurove dhe që është financuar nga BE-ja. Aty vazhdojnë punimet me anekset e tjera të këtij projekti. Ndërsa për kimikatet e tjera të rrezikshme ekzistojnë mjaft projekte për të cilat duhet të vendosë Ministria e Mjedisit. Nga kontaktet me drejtorin e Azotikut jam informuar për më shumë se 20 tonë kimikate të rrezikshme. Në përbërje të kësaj sasie kimikatesh ekziston mundësia e mbetjeve të cianurit, por them se shpejt do të ndërhyhet”, tregon prefekti i Fierit.

Komisioni i Emergjencave Civile në Prefekturën e Fierit deklaron se situata të rrezikshme për territorin e qarkut konsiderohen edhe zjarret. Për vitin 2008 mësohet se janë regjistruar 517 raste zjarresh, në të cilat është dashur ndërhyrja e Komisionit të Emergjencave Civile. Janë regjistruar 475 raste zjarri që kanë shkrumbuar rreth 3 500 rrënjë ullinj dhe kanë dëmtuar rreth 230 hektarë pyje, kullota, ullishta dhe drurë frutorë.

Ekspertët e ushtrisë mendojnë që të bëjnë demontimin në repartin që ndodhet pranë shtëpive. Në repartin ushtarak nr. 4032 të Grizës, që ndodhet vetëm një kilometër larg qendrës së Patosit dhe shtatë kilometra larg qendrës së Fierit, gjenden ende municione ushtarake të rrezikshme. Më shumë se dy tonë municione të llojeve të ndryshme janë të depozituara prej vitesh në këtë repart. Sipas drejtuesve të repartit, mësohet se ekzistenca e kësaj sasie të madhe municionesh vjen për shkak të rrezikut të transportit të tyre. Ushtarakët e repartit 4032 të Grizës, të cilët nuk pranojnë të identifikohen, shpjegojnë për gazetën “Shqip” se pjesa më e madhe e municioneve që gjendeshin në repart janë transportuar drejt Poliçanit. Gjatë tetorit të vitit 2008, automjete të shumta ushtarake kanë qarkulluar në fshatin Grizë, që ndodhet vetëm 100 metra larg këtij reparti dhe mësohet se kanë zhvendosur pjesën më të madhe të municioneve. Ushtarët në shërbim, në hyrjen e repartit të Grizës, si dhe oficerët e tjerë të lartë të repartit shpjegojnë se është pastruar pjesa më e madhe e magazinave të municioneve, por brenda tyre ekzistojnë ende mbi dy tonë municione të ndryshme, të cilat i janë nënshtruar një kontrolli të imtësishëm. “Janë vërejtur se municionet që kanë mbetur janë në gjendje jo të mirë teknike dhe se gjatë transportit mund të shpërthejnë. Demontimi i tyre është vendosur të kryhet në mjediset e repartit. Pritet që këtë proces ta kryejnë e shoqërojnë deri në fund specialistë të ushtrisë”, thonë drejtues të repartit nr. 4032. Tetorin e vitit të kaluar, banorët e fshatit Grizë shprehën shqetësim për praninë e shumë mjeteve ushtarake në rrugët e fshatit. Ashtu si tre muaj më parë, edhe sot, banorët thonë se janë të frikësuar. Ata kërkojnë që qeveria të marrë masat në mënyrë të menjëhershme dhe të japë siguri për ta. Ndërkaq, prefekti i Fierit, Shahin Bejdaj, thotë se pas komunikimeve që ka pasur gjatë ditëve të fundit të vitit të kaluar me drejtuesit e Ministrisë së Mbrojtjes, është informuar se po kryhet zhvendosje municionesh nga reparti i Grizës drejt Poliçanit. Ndërsa dje, prefekti u shpreh se nuk ka asnjë të dhënë për rrezikun, por pranon se ekzistojnë ende sasi të larta me municione në këtë repart, që do të zhvendosen gradualisht dhe në prani të specialistëve. Reparti 4032, që ka varësi nga Baza Ushtarake e Beratit, është klasifikuar si një nga zonat me rrezik shpërthimi municionesh nga inspektimet e Shtabit të Përgjithshëm të Forcave të Armatosura. Pas shpërthimit të ndodhur në Gërdec u kërkua që Griza të pastrohej nga municionet, por ky proces nisi gjatë muajit tetor.